ހުޅުމާލެ ދެވަނަ ފިޔަވަހީގައި އަލަށް ހުޅުވާ ޝަހީދު އަލީ ސްކޫލްގައި 100އަށްވުރެ ގިނަ ގަސް އިންދައިފިއެވެ.
އެ ސްކޫލްގައި 100އަށްވުރެ ގިނަ ގަސް އިންދާފައި ވަނީ އެޑިޔުކޭޝަން މިނިސްޓްރީގެ 93 ވަނަ އަހަރީ ދުވަހާ ގުޅުވައިގެން، ކުރިއަށްގެންދިޔަ ގަސް އިންދުމުގެ ބޮޑު ހަރަކާތުގެ ތެރެއިންނެވެ.
މި ހަރަކާތުގައި އެޑިޔުކޭޝަން މިނިސްޓަރ ޑރ. އިސްމާޢީލް ޝަފީޢުއާއި، މިނިސްޓްރީގެ މުވައްޒަފުންގެ އިތުރުން ރާއްޖޭގެ ހުރިހާ ސްކޫލްތަކުން ބައިވެރިވެ ވަޑައިގެންނެވިއެވެ.
މިއީ އެ މިނިސްޓްރީގެ އަހަރީ ދުވަސް ފާހަގަކުރުމުގެ ގޮތުން، ތިމާވެއްޓަށް ހޭލުންތެރިކުރުވުމާއި، ސަރުކާރުން ޤައުމީ ފެންވަރުގައި ކުރިއަށްގެންދާ “5 މިލިއަން ގަސް އިންދުމުގެ” ޕްރޮގްރާމަށް އެއްބާރުލުން ދިނުމުގެ ގޮތުން ކުރިއަށްގެންދެވުނު ޙަރަކާތެކެވެ.
މި ޙަރަކާތުގައި ހުޅުމާލެ ފޭސް 2 ގެ ބީޗް ސަރަޙައްދުގައާއި، ޝަހީދު ޢަލީ ސްކޫލްގައި 100 އަށްވުރެ ގިނަ ގަސް ވަނީ އިންދާފައެވެ. މީގެ އިތުރުން މާލެ އާއި އަތޮޅުތެރޭގެ ހުރިހާ ސްކޫލުތަކުގެ ދަރިވަރުންނާއި މުދައްރިސުން ވެސް މި ގަސްއިންދުމުގެ ޙަރަކާތުގައި ބައިވެރިވިއެވެ.
އަންނަ ދިރާސީ އަހަރު ފެށޭއިރު ޝަހީދު އަލީ ސްކޫލްގައި ކިޔައިވައިދޭން ފެށޭނެ ކަމަށެވެ. އެއީ ހުޅުމާލޭގެ ދެވަނަ ފިޔަވަހީގައި އިމާރާތްކުރި ދެވަނަ ސްކޫލެވެ. އެންމެ ފުރަތަމަ ހުޅުމާލޭ ދެވަނަ ފިޔަވަހީގައި އިމާރާތްކުރި ސްކޫލަކީ ސަލާހުއްދީން ސްކޫލެވެ.
ކިޔުންތެރިންގެ ހިޔާލު