ދެ އަހަރު ފަހުން ކޮންމެ ރައްޔިތެއްގެ އަތުގައި އޮންނާނީ ޑިޖިޓަލް އައިޑީކާޑެއްް ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިރޭ ވިދާޅުވެއްޖެ އެވެ.
“ނޭޝަނަލް ޔޫތު ކޮންފަރެންސް 2025” ގައި ހިމެނިގެން މިރޭ ބޭއްވި “ޔޫތު ކޮފީ ވިތު ޕްރެޒިޑެންޓް” ހަރަކާތުގައި ވާހަކަފުޅު ދައްކަވަމުން ރައީސް ވިދާޅުވީ ރާއްޖެ ޑިޒިޓަލައިޒް ކުރުމަކީ އެމަނިކުފާނުގެ ވަރަށް ބޮޑު ތަސައްވުރެއް ކަމަށެވެ. އެ އަމާޒަށް މަސައްކަތް ފައްޓަވާ ގިނަ ނަތީޖާތަކެއް ނެރެވިފައިވާކަން ފާހަގަ ކުރެއްވި އެވެ.
ރައީސް ވަނީ ދިވެހި ރައްޔިތެއްކަން އަންގައިދޭ ކާޑު, ޑިޖިޓަލް ކާޑަކަށް ބަދަލު ކުރުމަށް މަސައްކަތް ކުރައްވަމުން ގެންދަވާކަން ފާހަގަ ކުރައްވާފަ އެވެ. އެމަނިކުފާނު ވިދާޅުވި ގޮތުގައި ދެ އަހަރުތެރޭ އެ އަމާޒަށް ވާސިލްވޭނެ އެވެ.
އޭރުން ކޮންމެ ދިވެއްސެއްގެ އަތުގައި އޮންނާނީ ގިނަ ޚިދުމަތްތަކަށް އެކްސެސްވެވޭ ޑިޖިޓަލް އައިޑީ ކާޑެއް ކަމުގައި ވިދާޅުވި އެވެ.
“ކޮންމެ ދިވެއްސެއް އަތުގައި އޮންނާނީ 2027ގެ ނިޔަލަށްވާއިރު ފިިޒިކަލް ކާޑެއް އެހެން ނަމަވެސް ޑިޖިޓަލް އައިޑީ ކާޑެއް. މިހާރު އޮންނަ ނެޝަނަލް އައިޑީކާޑު ބަދަލުވާނީ މި ދެންނެވި ހުރިހާ ސަރވިސްތަކަށް އެކްސަސްވާ ނެޝަނަލް ޑިޖިޓަލް އައިޑީކާޑަކަށް,” ރައީސް ވިދާޅުވި އެވެ.
ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު އިއުލާނުކުރައްވާފައިވާ “މޯލްޑިވްސް 2.0” ސިޔާސަތުގެ ދަށުން ވަރަށް ގިނަ ޚިދުމަތްތައް ޑިޖިޓަލައިޒް ކުރުމުގެ މަސައްކަތް ދަނީ ކުރަމުންނެވެ.
ކިޔުންތެރިންގެ ހިޔާލު