ބީއެމްއެލް އިން ދިވެހިރާއްޖޭގެ ޑިޖިޓަލް ޕޭމަންޓުގެ ހައްލުތައް ހަރުދަނާކުރުމަށާއި ރާއްޖޭގެ ފަތުރުވެރިކަން ކުރިއެރުވުމަށް މުހިންމު 2 އެއްބަސްވުމެއްގައި ސޮއިކޮށްފިއެވެ.
މި އެއްބަސްވުމަކީ ބީއެމްއެލް، ވީޗެޓް ޕޭ (އިން ވޭސިންގ ޕޭ) އަދި ވިޒިޓް މޯލްޑިވްސް އާ ދެމެދު ވެފައިވާ ސްޓްރެޓީޖިކް އެއްބަސްވުމެކެވެ.
މި އެއްބަސްވުމުގެ ދަށުން ރާއްޖޭގެ ފަތުރުވެރިކަން ފުޅާކުރުމަށް މުހިންމު މަސައްކަތްތަކެއް ކުރެވިގެންދާނެއެވެ.
އެގޮތުން ރާއްޖެ މާކެޓު ކުރުމާއި ރާއްޖެ އާއި ފަތުރުވެރިންގެ ގުޅުންތައް އިތުރުކުރުން ހިމެނެއެވެ. އަދި ހަމައެހެންމެ މުޖުތަމައުގައި ޑިޖިޓަލް ހަރަކާތްތައް އިތުރުކުރުމާ، ރާއްޖޭގައި ފަތުރުވެރިކަން ކުރިއެރުވުމަށް ގުޅިގެން މަސައްކަތްތަކެއް ކުރުމަށް ނިންމާފައިވެއެވެ. އަދި ހަމައެހެންމެ، ދިވެހި އާންމު ފަރުދުންނާއި ވިޔަފާރިވެރިންނަށް ފައިސާގެ މުއާމަލާތްތަކުގައި ބަޔޯމެޓްރިކްސްފަދަ އީޖާދީ ގޮތްތައް ބޭނުންކޮށްގެން ލުއިފަސޭހަކަމާއެކު ފައިސާ ދެއްކުމަށް ހުރި ފުރުސަތުތައް މުރާޖައާ ކުރަމުންދާނެއެވެ.
ފަތުރުވެރިކަން ކުރިއެރުވުމަށް ސޮއިކުރެވުނު މި އެއްބަސްވުމާއެކު ކުރެވޭ މަސަައްކަތަކުގެ ތެެރެއިން ޗައިނާގެ ފަތުރުވެރިންނަށް ފައިސާގެ މުއާމަލާތްކުރުމުގައި ފަސޭހަ އަދި ފުރިހަމަ ތަޖުރިބާއެއް ހޯދައިދިނުމަށް ޚާއްސަ އަހަަންމިއްޔަތެއް ދެވޭނެކަމަށް މައުލޫމާތު ދީފައިވެއެވެ.
ރާއްޖޭގެ ޑިޖިޓަލް އީކޯސިސްޓަމް ހަރުދަނާކުރުމަށް، ބީއެމްއެލް އާއި ވީޗެޓް ގުޅިގެން ވޭސިންގ ޕޭ އިކޯސިސްޓަމާ ގުޅޭ މައުލޫމާތު ފޯރުކޮށްދިނުމުގެ ސެޝަނެއް ބާއްވާފައިވެއެވެ.
ރާއްޖެއަށް އެންމެ ގިނައިން ޒިޔާރަތްކުރާ ޗައިނާގެ ފަތުރުވެރިން، ވޭސިންގ ޕޭ ބޭނުންކޮށްގެން ފަސޭހަކަމާއެކު ޑިޖިޓަލް ޕޭމަންޓް ހެދޭނެ ގޮތްތައް ހިއްސާކޮށްފައިވެއެވެ. އަދި އެ ޚިދުމަތްތައް ބޭނުންކޮށްގެން ފަތުރުވެރިންގެ ތަޖުރިބާ އިތުރަށް ފުރިހަމަކުރެވޭނެ ގޮތްތަކާ ބެހޭ ގޮތުން މި ސެޝަނުގައި ބައިވެރިވި ފަތުރުވެރިކަމުގެ ދާއިރާގައި ފާހަގަކޮށްލެވޭ ރިސޯޓުތަކުގެ މަންދޫބުންނަށް މައުލޫމާތު ދީ އެކަމާ ގުޅޭ މަޝްވަރާތަކެއް ވަނީ ކުރިޔަށްގެންގޮސްފައެވެ.
“ވޭސިންގ ޕޭ އަދި ވިޒިޓް މޯލްޑިވްސް އާއި ގުޅިގެން ފަތުރުވެރިންނާއި ވިޔަފާރިތަކަށް ފައިސާދެއްކޭނެ އީޖާދީ އަދި ރައްކާތެރި ގޮތްތައް ހަމަޖެހިގެން ދިއުމަކީ އަޅުގަނޑު ވަރަށް އުފާކުރާ ކަމެއް. ބަޔޯމެޓްރިކް ބޭނުންކޮށްގެން ފައިސާދެއްކޭ ފަދަ ޓެކްނޮލަޖީތަކާ އެކު ފަތުރުވެރިންނަށް ފައިސާގެ މުއާމަލާތްތައް ކުރުމުގެ ތަޖުރިބާ އިތުރަށް ފުރިހަމަވެގެންދާނެ. މީގެ ސަބަބުން އެކި ގައުމުތަކުން ރާއްޖެއަށް އަންނަ ފަތުރުވެރިންނަށް ދެވޭ ޚިދުމަތްތައް އިތުރަށް ފުރިހަމަވެ ފަތުރުވެރިންގެ އުންމީދުތައް ހަގީގަތަކަށް ހަދައި ފަތުރުވެރިކަން ކުރިއެރުމަށް އެހީތެރިވެދޭނެ.” ބީއެމްއެލްގެ ސީއީއޯ އަދި މެނޭޖިންގ ޑިރެކްޓަރ މުޙައްމަދު ޝަރީފް ވިދާޅުވިއެވެ.
ކިޔުންތެރިންގެ ހިޔާލު