އަންނަ އަހަރުގެ އޭޕްރީލް މަހުގެ ހަތަރު ވަނަ ދުވަހު ބާއްވާ ލޯކަލް ކައުންސިލް އިންތިޚާބުގައި އައްޑޫ ސިޓީގެ މޭޔަރުކަމަށް، ވެރިކަން ކުރާ ޕީޕަލްސް ނެޝަނަލް ކޮންގްރެސް (ޕީއެންސީ) ގެ ޕްރައިމަރީގައި ވާދަކުރެއްވުމަށް ޑރ. އަޙްމަދު ޢަދީލް ނަޞީރު ފޯމު ހުށަހަޅުއްވައިފިއެވެ.

ޑރ. އަދީލްއަކީ ޕީއެންސީން ޕްރައިމަރީއަށް ފުރުސަތު ހުޅުވާލުމުން އައްޑޫ ސިޓީގެ މޭޔަރުކަމަށް ވާދަކުރެއްވުމަށް ފޯމު ހުށަހެޅުއްވި ފުރަތަމަ ކެންޑިޑޭޓެވެ.

ފޯމު ހުށަހެޅުއްވުމަށްފަހު އެކްސް އާއި ފޭސްބުކްގައި ކުރެއްވި ޕޯސްޓެއްގައި ޑރ. އަދީލް ވަނީ ޕީއެންސީގެ އެންމެހައި މެންބަރުންގެ ތާއީދަށް އެދިވަޑައިގެންފައެވެ.

ޑރ. އަދީލް މިހާރު ހުންނެވީ އެޑިއުކޭޝަން މިނިސްޓްރީގެ ސްޓޭޓް މިނިސްޓަރު ކަމުގެ މަގާމްގައެވެ. އޭނާ އަކީ ތައުލީމީ ދާއިރާއިން ކުރިއަރަމުން އައި އައްޑޫ ސިޓީގެ ހިތަދޫ އަށް ނިސްބަތްވާ އިލްމީ ބޭފުޅެކެވެ.

ޕީއެންސީން އަންނަނީ ލޯކަލް ކައުންސިލް އިންތިޚާބަށް ތައްޔާރުވުމުގެ ގޮތުން ޕާޓީގެ ޓިކެޓް ދޭނެ ކެންޑިޑޭޓުން ކަނޑައެޅުމަށް ޕްރައިމަރީ ބޭއްވުމަށް ތައްޔާރުވަމުންނެވެ. އައްޑޫ ސިޓީގެ މޭޔަރުކަމުގެ ގޮނޑިއަކީ ވާދަވެރި ގޮނޑިއެއް ކަމުން، މި ގޮނޑިއަށް ޕީއެންސީގެ ޓިކެޓް ހޯދުމަށް ގިނަ ބޭފުޅުން ޝައުގުވެރިކަން ފާޅުކޮށްފައިވެއެވެ. ޕީއެންސީގެ ޕްރައިމަރީއަށް ފޯމު ހުށަހެޅުމުގެ ސުންގަޑިއަކީ ޑިސެމްބަރު 15 ވަނަ ދުވަހެވެ.

އައްޑޫ ސިޓީއަކީ ރާއްޖޭގެ ދެކުނުގެ އެންމެ ބޮޑު އާބާދީ އޮންނަ ސިޓީއެވެ. މި ސިޓީގެ މޭޔަރުކަމުގެ ގޮނޑިއަކީ ސިޔާސީ ގޮތުން ވެސް ވެރިކަންކުރާ ޕީއެންސީއަށް މުހިންމު ގޮނޑިއަކަށް ވާނެއެވެ. މީގެ ކުރިން ހުރިހާ ދައުރެއްގައި ވެސް މި ގޮނޑި ކާމިޔާބުކޮށްފައިވަނީ އިދިކޮޅު އެމްޑީޕީ އިންނެވެ. އަދި އައްޑޫ ސިޓީގެ މިހާރުގެ މޭޔަރު އަލީ ނިޒާރަކީ ވެސް އެމްޑީޕީގެ ބޭފުޅެކެވެ