ހއ. ހޯރަފުށީ ކައުންސިލްގެ ރައީސް މުހައްމަދު ވަހީދު ގާނޫނާ ޚިލާފު ކަމެއް ކުރިކަން ފާހަގަވުމުން ތިން މަސް ދުވަހަށް ސަސްޕެންޑްކޮށްފިއެވެ.

ލޯކަލް ގަވާމަންޓް އޮތޯރިޓީ (އެލްޖީއޭ) އިން މިއަދު ބުނީ ވަހީދު ސަސްޕެންޑްކުރީ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނުގެ ބައެއް މާއްދާތަކާ އޭނާ ޚިލާފުވެފައިވާތީ ކަމަށެވެ.

ސުލޫކީ މިންގަނޑާއި ހިލާފަށް ހޯރަފުށީ ކައުންސިލްގެ މެމްބަރުންގެ އަމަލުތައް ބަހައްޓާފަައިވާ ކަމަށް އެލްޖީއޭގެ އިންކުއަރީން ވަނީ ހާމަވެފަ އެވެ. އެކަމުގެ ގެއްލުން ކައުންސިލާއި ލާމަރުކަޒީ ނިޒާމަށް ލިބިފައިވާ ކަމަށް ވެސް އެލްޖީއޭ އިން ބުންޏެވެ.

މީގެ އިތުރުން، އިންކުއަރީ އެލްޖީއޭގެ ރިޕޯޓުގައި ފާހަގަކޮށްފައިވާ ވަކިވަކި މައްސަލަތަކާ ގުޅިގެން އެ ރިޕޯޓުގައި ލަފާދީފައިވާ ގޮތަށް ކަންކަން ކުރުމަށާއި ކައުންސިލް އިދާރާގެ ސެކްރެޓަރީ ޖެނެރަލާއި އިދާރީ އެހެން މުވައްޒަފެއްގެ އިހުމާލެއްވާ ނަމަ އެކަންކަމަށް ޒިންމާވާ މުވައްޒަފަށް ފިޔަވަޅު އެޅުމަށް އެ މައްސަލައަކާއި ގުޅުންހުރި، ދައުލަތުގެ އިދާރާތަކަށް ހުށަހެޅުމަށް ވެސް އެލްޖޭއޭން މިއަދު ވަނީ ނިންމާފައެވެ.

ހޯރަފުށީ ކައުންސިލްގައި ބާކީ ތިބި ހުރިހާ ކައުންސިލަރުން ވަނީ ސަސްޕެންޑުކޮށްފިއެވެ.