ފެނަކަ ކޯޕަރޭޝަންގެ ބިލުތަކުން ސަބްސިޑީ ދޭނެކަމަށް ބުނެ ސްކޭމެއް ހިންގާތީ ސަމާލުވުމަށް އެދިއްޖެއެވެ.

ފެނަކައިން މިއަދު ބުނީ، އެ ކުންފުނިން ދޭ ޚިދުމަތްތަކުގެ ބިލުތަކުން ސަބްސިޑީ ދޭނެކަމަށް ބުނެ، އެ ކުންފުނީގެ ނަމުގައި އޮޅުވާލައިގެން ފައިސާ ހޯދުމަށް ސްކޭމެއް ހިންގަމުން އަންނަކަމަށެވެ.

އެހެންވެ އެފަދަ ލިންކެއް ނުވަތަ ކޯލެއް ލިބިއްޖެނަމަ، ކަމާބެހޭ ފަރާތްތަކަށް އަވަހަށް ރިޕޯޓުކުރުމަށް ފެނަކައިން ވަނީ އެދިފައެވެ.

ރާއްޖޭގައި އެކި ކުންފުނި، ވިޔަފާރިތަކާއި އިދާރާތަކުގެ ނަމުގައި ސްކޭމް ހިންގުން އިތުރުވެފައިވާއިރު، ދިވެހި ފުލުހުންގެ ޚިދުމަތުގެ އެންޓި ސްކޭމް ސެންޓަރުން އެންމެ ފަހުން އާންމުކުރި ތަފާސްހިސާބަށް ބަލާއިރު، މިދިޔަ ނޮވެމްބަރު މަހު ސްކޭމްގެ 164 މައްސަލައެއް ރިޕޯޓުކޮށްފަވެއެވެ. އެ މައްސަލަތަކުން ޖުމްލަ 1،520،269 ރުފިޔާ ގެއްލިފައިވާއިރު، 387،971 ރުފިޔާ ވަނީ ރިކަވަރ ކޮށްފައެވެ.

މި މައްސަލަތަކުގެ ތެރެއިން 80 މައްސަލައަކީ އީ-ކޮމާސް މެދުވެރިކޮށް ހިންގާފައިވާ ސްކޭމްގެ ތަކެވެ. މީގައި އިންޕަރސަނޭޝަން މެދުވެރިކޮށް ހިންގާފައިވާ 36 މައްސަލަ، ލާރި މާރުކޮށްދިނުމުގެ ނަމުގައި 21 މައްސަލަ އަދި ފިޝިންގ، ވިޝިންގ އަދި ޖޮބްސްކޭމްގެ 12 މައްސަލަ ހިމެނެއެވެ.

މި ސްކޭމްތައް ހިންގުމަށް ފޯނު ކޯލާއި، އައިބޭ، އޮންލައިން މެސެޖިން، ފިޝިންގ ލިންކް އަދި ފޭސްބުކް މާކެޓް ޕްލޭސް ހިމެނެއެވެ.