ތޫފާން ދީތުވާގެ ސަބަބުން ސްރީ ލަންކާއަށް ކުރިމަތިވި ގެއްލުންތަކުން އަރައިގަތުމަށް އެހީވުމުގެ ގޮތުން އެލިއާ ކުންފުނިން އެ ގައުމަށް 20،000 ޑޮލަރު ހަދިޔާކޮށްފިއެވެ.
މި އެހީ ސްރީ ލަންކާގެ ހައިކޮމިޝަނާ ހަވާލުކޮށްދެއްވީ އެލިއާގެ ސީއެފްއޯ ސަމަން ޕުޝްޕަކުމާރާ އެވެ. ސްރީ ލަންކާގެ ހައި ކޮމިޝަންގެ ފަރާތުން އެ އެހީއާ ހަވާލުވެ ވަޑައިގަތީ އެ ގައުމުގެ ހައި ކޮމިޝަނަރު މުހަންމަދު ރިޒްވީ ހަސަން އެވެ.
އެލިއާ އިން މި އެހީ ދިނުމަށް ނިންމީ، ގިނަ އަދަދެއްގެ ލަންކާ ރައްޔިތުން ރާއްޖޭގައި ދިރިއުޅެމުން އަދި މަސައްކަތް ކުރަމުން އަންނައިރު، އެއީ ދިވެހި މުޖުތަމައަށް މުހިންމު އެކިއެކި ދާއިރާތަކުން އެހީތެރިކަން ފޯރުކޮށްދޭ ބައެއް ކަމަށްވާތީ އެ ގައުމަށް އެހީއަށް ބޭނުންވެފައިވާ ދަނޑިވަޅުގައި އެހީ ފޯރުކޮށްދިނުމަކީ މުހިންމުކަމެއް ކަމަށް ދެކޭތީއެވެ.
ތޫފާން ދީތުވާގެ ސަބަބުން ލަންކާއަށް ކުރި ގަދަ ވިއްސާރައިގެ ހާދިސާތަކުގައި މަރުވި މީހުންގެ އަދަދު 330 އަށް ވުރެ އިތުރުވެފައިވާ އިރު، ގެއްލިފައިވާ މީހުން ހޯދުމުގެ މަސައްކަތް އަދިވެސް ދަނީ ކުރިއަށެވެ.
މީގެ އިތުރުން، ތޫފާނުގައި ލަންކާއަށް ވެފައިވާ ގެއްލުމުން އަރައިގަތުމަށް އެހީވުމުގެ ގޮތުން ޕީއެސްއެމްއިން އިސްނަގައިގެން ބޭއްވި ހާއްސަ ޓެލެތޯނެއްގައި ވަނީ 11 މިލިއަނަށް ވުރެ ގިނަ ރުފިޔާ އެއްކުރެވިފައެވެ.
ކިޔުންތެރިންގެ ހިޔާލު