ރައީސް ޑރ. މުހައްމަދު މުއިއްޒު މާފަންނު ރައްޔިތުންނާ ބައްދަލުކުރައްވަން ބާއްވަވާ ޖަލްސާއާ ގުޅިގެން މާފަންނު މެދު ދާއިރާގެ މެންބަރު އަސްމާ ރަޝީދު ދާއިރާގެ ރައްޔިތުންނަށް ފޮނުއްވި މެސެޖުގެ މާނަ އޮޅިފައިވާ ނަމަ އެކަމަށް މައާފަށް އެދިވަޑައިގަންނަވާ ކަމަށް އޭނާ ވިދާޅުވެއްޖެ އެވެ.

އަންނަ ބުރާސްފަތި ދުވަހުގެ ރޭ އޮންނަ އެ ބައްދަލުވުމުގައި ރައީސާ ކުރަން ބޭނުންވާ ސުވާލުތައް ހިއްސާކޮށްދިނުމަށް އެދި މިދިޔަ ބުދަ ދުވަހު އަސްމާ ފޮނުއްވި މެސެޖާ ގުޅިގެން ސޯޝަލް މީޑިއާގައި އޭނާއަށް ވަނީ ފާޑުކިޔުން އަމާޒުވެފަ އެވެ.

ރޭ ނެރުއްވި ބަޔާނެއްގައި އަސްމާ ވިދާޅުވީ އެ މެސެޖު ފޮނުއްވީ ބައްދަލުވުމުގައި ރައީސާ ސީދާ ސުވާލު ކުރުމުގެ ފުރުސަތު ނުލިބޭ ފަރާތްތަކުގެ ކަންބޮޑުވުންތައް ރައީސާ ހަމައަށް ފޯރުކޮށްދެއްވުމުގެ ބޭނުމުގައި ކަމަށެވެ. އެއީ އޭނާ އަމިއްލަ ހައިސިއްޔަތުން ފޮނުއްވި މެސެޖެއް ކަމަށް ވެސް ވިދާޅުވި އެވެ.