ރާއްޖޭގައި ދިރިއުޅެމުން އަންނަ ބަންގްލަދޭޝްގެ މަސައްކަތްތެރީންގެ ހައްގުތައް ކަށަވަރު ކުރުމަށް ކުރެވިދާނެ މަސައްކަތްތަކާ ގުޅޭގޮތުން އދ އާއި ރާއްޖޭގައި ހުންނަ ބަންގްލަދޭޝް އެމްބަސީން މަޝްވަރާކޮށްފިއެވެ.

ބަންގްލަދޭޝްގެ ނޫސްތަކުގައި ރިޕޯޓްކޮށްފައިވާގޮތުގައި ހޯމަ ދުވަހު މި ބައްދަލުވުން ކުރިއަށްގެންގޮސްފައިވަނީ ރާއްޖޭގައި ހުންނަ އދ ގެ ރެސިޑެންޓް ކޯޑިނޭޓަރ ހައޯ ޒަންގާއި ރާއްޖޭގައި ހުންނަ ބަންގްލަދޭޝްގެ ހައި ކޮމިޝަނަރު އެމްޑީ ނަޒްމުލް އިސްލާމާ ދެމެދުގައެވެ.

ބިދޭސީ މަސައްކަތްތެރީންގެ ރައްކާތެރިކަމާއި ހައްގުތައް ކަށަވަރު ކުރުމާއި އަސާސީ ޚިދުމަތްތައް އެ މަސައްކަތްތެރީންނަށް ލިބިދިނުމާއި ޤާނޫނީ އެހީތެރިކަން ލިބިދިނުމާމެދު މަޝްވަރާ ކުރެވުނު ކަމަށާއި އަދި ރާއްޖެއާއި އދ އަދި ބަންގްލަދޭޝް އާ ދެމެދު މިކަންކަމާ ގުޅޭ މަޝްވަރާ ބައްދަލުވުންތަކެއް ކުރިއަށްގެންދިއުމަށް އެއްބަސްވެފައިވާކަމަށްވެސް ބަންގްލަދޭޝްގެ ނޫސްތަކުގައި ރިޕޯޓްކޮށްފައިވެއެވެ.

ރާއްޖޭގައި އެންމެ ގިނަ ބިދޭސީ މަސައްކަތްތެރިންގެ ގޮތުގައި އުޅެނީ ބަންގްލަދޭޝްގެ ރައްޔިތުންނެވެ. ރާއްޖޭގައި އުޅޭ އެ ގައުމުގެ މަސައްކަތްތެރީންގެ އަދަދު 100،000 އަށް އަރައެވެ.