ބަންގްލަދޭޝްގެ ކުރީގެ ބޮޑުވަޒީރު ޝެއިހް ހަސީނާ މެރުމަށް ހުކުމްކުރުމާއެކު އދ އިން ކަންބޮޑުވުން ފާޅުކޮށްފިއެވެ.

ހަސީނާ މެރުމަށް އިއްޔެ އެ ގައުމުން ހުކުމްކޮށްފައިވަނީ ސަރުކާރާ ދެކޮޅަށް އެގައުމުގެ އެކި ކަންކޮޅުތަކުގައި އާންމުން ކުރި މުޒާހަރާތަކާ ދެކޮޅަށް ބާރުގެ ބޭނުންކޮށް ގިނަ ބަޔަކު މަރުވެފައިވާ މައްސަލައިގައެވެ.

އެ މުޒާހަރާތަކުގައި 1،400 އެއްހާ މީހުން މަރުވެފައިވާ އިރު، އެ ހުކުމުގައި ވަނީ ޝެއިހް ހަސީނާ މެރުމަށް ހުކުމްކޮށްފައިވަނީ އިންސާނިއްޔަތާ ދެކޮޅަށް ހިންގި ކުށްތަކުގެ ސަބަބުން ކަމަށް ރިޕޯޓުތަކުން ބުނެއެވެ.

ބަންގްލަދޭޝްގެ ކުރީގެ ބޮޑުވަޒީރު ޝެއިހް ހަސީނާ މެރުމަށް ހުކުމްކޮށްފައިވާ އިރު، އެ ހުކުމާ މެދު ކަންބޮޑުވުން ފާޅުކޮށް އދ އިން ވަނީ ކަންބޮޑުވުން ފާޅުކޮށްފައެވެ.

އދގެ އިދާރާގެ ތަރުޖަމާނު ރަވީނާ ޝަމްދަސާނީ ވިދާޅުވީ ހަސީނާގެ ޣައިރު ހާޒިރުގައި ކުރި ތަހުގީގަށްފަހު ޝަރީއަތް ކުރިއަށްގެންގޮސް ހުކުމް ކޮށްފައިވާ އިރު، އެ ޝަރީއަތަކީ ބައިނަލްއަގުވާމީ ގާނޫނުތަކާ ހިލާފު ޝަރީއަތެއް ކަމަށެވެ.

މަރަން ކުރި ހުކުމާ ދެކޮޅު ކަމަށާއި ހުރިހާ ގޮތަކުން ވެސް އެކަމާ ދެކޮޅު ކަމަށް އދގެ ތަރުޖަމާނު ވިދާޅުވިއެވެ.

ބަންގްލަދޭޝްގައި އާންމުން ސަރުކާރާ ދެކޮޅަށް ނުކުމެ ކުރި ބޮޑެތި މުޒާހަރާތައް ކޮންޓްރޯލުން ނެއްޓި ވެރިކަން ވެއްޓެން ދިއުމާއެކު އޭރުގެ ބޮޑުވަޒީރު ޝެއިހް ހަސީނާ ވަނީ ގައުމު ދޫކުރައްވައި އިންޑިއާއަށް ވަޑައިގެންފައެވެ.