ރައީސް ޑރ. މުހައްމަދު މުއިއްޒު ވެރިކަމާ ހަވާލުވެވަޑައިގަތުމަށްފަހު އަންހެނުން ބާރުވެރިކުރުވުމަށް ފެށި މަސައްކަތްތަކުގެ ނަތީޖާ ފެންނަން ފަށާފައިވާކަމަށް އިޖުތިމާޢީ އަދި އާއިލީ ތަރައްޤީއާ ބެހޭ ވަޒީރު ޑރ. ޢާއިޝަތު ޝިހާމް ވިދާޅުވެއްޖެއެވެ.

ރެހެނދި އެވޯޑް ދިނުމަށް ރޭ ބޭއްވި ހަފްލާގައި ވާހަކަދައްކަވަމުން ވަޒީރު ޑރ. ޢާއިޝަތު ޝިހާމް ވިދާޅުވީ، ރައީސްމުއިއްޒު ވެރިކަމަށް ވަޑައިގަތުމަށްފަހު އަންހެނުންގެ ހުރި ކަންބޮޑުވުންތައް ބައްލަވައި، އަންހެނުންގެ ހުރި ކަންބޮޑުވުންތަކަށް ހައްލު ގެނައުމަށް މަސައްކަތް ފެއްޓެވި ކަމަށެވެ.

އަންހެނުންގެ ހުރި އެންމެ ބޮޑު އެއް ކަންބޮޑުވުމަކީ ވިޔަފާރި ފެށުމަށް އަންހެނުންނަށް ލޯނު ހޯދުމުގައި ހުރި އުނދަގޫތައް ކަމަށާއި، އެގޮތުން މި ސަރުކާރުން އަންހެނުންނަށް ހާއްސަކޮށް ލޯން ސްކީމެއް ތައާރަފްކުރެވިފައިވާކަމަށް ވަޒީރު ވިދާޅުވިއެވެ. އަންހެނުންނަށް ހާއްސަކޮށް 100 މިލިއަން ރުފިޔާގެ ލޯނު ސްކީމެއް މި ސަރުކާރުން ވަނީ ތައާރަފްކޮށްފައެވެ، އެލޯނުގެ 25 އިންސައްތަ ނުކުޅެދުންތެރިކަން ހުންނަ މީހުންނަށް ވަނީ ހާއްސަކޮށްފައެވެ.

މިހާތަނަށް 83 ފަރާތަކަށް އެ ލޯނު ވަނީ ދޫކުރެވިފައެވެ. އޭގެތެރެއިން 45 އިންސައްތަ މީހުން ވިޔަފާރިފަށައި އެކަމުގެ މަންފާ ލިބިގަންނަމުން އަންނަ ކަމަށް އެކަމަނާ ވިދާޅުވިއެވެ.

ޒަމާނީ ޓެކްނޮލޮޖީއާ ވިޔަފާރީގެ އުކުޅުތައް ބޭނުންކޮށްގެން އަންހެނުންނަށް އަމާޒުކޮށް ވިޔަފާރީގެ ތަމްރީނުތައް ކުރިއަށްގެންދިޔުމަކީ ވެސް މި ސަރުކާރުން ހާސިލުކުރި މުހިންމު ކާމިޔާބީއެއްގެ ގޮތުގައި ވަޒީރު ސިފަކުރެއްވިއެވެ.

ވަޒީރު ވިދާޅުވީ ސަރުކާރުން އަންހެނުން ބާރުވެރިކޮށް ދައުލަތް ހިންގުމުގައިވެސް އެފަރާތްތަކުގެ ހިއްސާ މިއަދު އިތުރުކޮށްފައިވާކަމަށެވެ. އެގޮތުން ސަރުކާރު ހިއްސާވާ ކުންފުނިތަކުގެ ބޯޑުތަކަށް އައްޔަނުކުރާ އަންހެނުންގެ ނިސްބަތް އިތުރުކޮށް، ސީއެމްޑިއޭ، އެންސްޕާ އަދި އާސަންދަ ފަދަ ތަންތަނުގެ އެންމެ އިސް މަގާމުތަކުގައި މިއަދު އަންހެނުން ތިބިކަން ވަޒީރު ފާހަގަކުރެއްވިއެވެ.

އަންހެނުންނަށް ކުރާ އނިޔާ ހުއްޓުވުމަށާއި، ޤާނޫނީ ގޮތުން އަންހެނުންނަށް ލިބެންޖެހޭ ރައްކާތެރިކަން ހޯދައިދުނުމަށްވެސް ގިނަ މަސައްކަތްތަކެއް ސަރުކާރުން ކުރަމުން އަންނަ ކަމަށް ވަޒީރު ވިދާޅުވިއެވެ.