ރާއްޖޭގެ 55 ރަށުގައި އަޅަން ނިންމާފައިވާ ކައުންސިލް އިދާރާގެ އިމާރާތްތަކުގެ މަސައްކަތް އަންނަ އަހަރުގެ ޖުލައި މަހުގެ ނިޔަލަށް ނިންމާލެވޭނެ ކަމަށް ލޯކަލް ގަވަމެންޓް މިނިސްޓްރީން ބުނެފިއެވެ.
އެ މިނިސްޓްރީން ބުނީ، ކައުންސިލް އިމާރާތްތައް އިމާރާތްކުރުމަށް ހިންގާ މަޝްރޫއުގެ ދަށުން މިހާރު ވަނީ 42 ރަށަކަށް ތަކެތި މޮބިލައިޒްކުރެވިފައި ކަމަށެވެ. އަދި 38 ރަށެއްގައި ކައުންސިލް އިމާރާތްތައް އެޅުމަށް ބޭނުންވާ ސާމާނު ސައިޓަށް ފޮނުވާފައިވާ ކަމަށް ވެސް އެ މިނިސްޓްރީން ބުންޏެވެ.
އަންނަ އަހަރުގެ ޖުލައި މަސް ނިމުމުގެ ކުރިން މި ހުރިހާ އިމާރާތްތައް ނިމި، ކައުންސިލްތަކުގެ ޚިދުމަތްތައް ފެށޭނެ ކަމަށް ލޯކަލް ގަވާމެންޓް މިނިސްޓްރީން ބުންޏެވެ.
ރަށްރަށުގެ ކައުންސިލް އިމާރާތްތައް އަޅަން ސަރުކާރުން ވެފައިވާ ވައުދުގެ ދަށުން 55 ރަށެއްގެ މަސައްކަތް މިހާރު ހަވާލުކޮށްފައިވަނީ ރަޝީދު ކާޕެންޓްރީ އެންޑް ކޮންސްޓްރަކްޝަން (އާރުސީސީ) އާ އެވެ. އެ މަސައްކަތް އެ ކުންފުންޏާ ހަވާލުކުރީ ކޮންޓެކްޓާ ފައިނޭންސްގެ އުސޫލުންނެވެ. މަސައްކަތް ނިންމާ ހަވާލުކުރުމުން ސަރުކާރުން އެ ކުންފުންޏަށް ފައިސާ ދައްކަން ފަށާނެއެވެ.
މީގެއިތުރުން ޗައިނާ ސަރުކާރުގެ ހިލޭ އެހީގެ ދަށުން ވެސް ގިނަ އަދަދެއްގެ ކައުންސިލް އިދާރާގެ އިމާރާތްތައް އަޅަން ވަނީ ނިންމާފައެވެ.
ކިޔުންތެރިންގެ ހިޔާލު