މިދިޔަ އަހަރަށްވުރެ މި އަހަރު މުދާ އެކްސްޕޯޓް ކުރި މިންވަރު އިތުރުވެއްޖެ އެވެ.

މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން އާންކޮށްފައިވާ ތަފާސްހިސާބުތަކުން ދައްކާގޮތުގައި މިއަހަރު އެކްސްޕޯޓްކުރި މުދަލުގެ އަގު 39.6 މިލިއަން ޑޮލަރު އިތުރެވެ.

ތަފާސްހިސާބުތައް ދައްކާ ގޮތުގައި މި އަހަރުގެ ސެޕްޓެންބަރު މަހުގެ ނިޔަލަށް ރާއްޖެއިން 323.6 މިލިއަން ޑޮލަރުގެ މުދާ އެކްސްޕޯޓްކޮށްފައިވެ އެވެ. މި އަހަރުގެ އެކްސްޕޯޓްގެ ތެރެއިން 211 މިލިއަން ޑޮލަރަކީ ރި-އެކްސްޕޯޓެވެ. އަދި މީގެތެރެއިން 167.8 މިލިއަން ޑޮލަރުގެ ޖެޓް ފިއުލް ރި-އެކްސްޕޯޓްކޮށްފައިވެ އެވެ.

މިއީ މިދިޔަ އަހަރުގެ މި މުއްދަތުގައި އެކްސްޕޯޓްކުރި 284 މިލިއަން ޑޮލަރުގެ މުދަލަށްވުރެ 13.9 އިންސައްތަ އިތުރު އަދަދެއްކަމަށް އެމްއެމްއޭއިން ބުނެ އެވެ.

ތަފާސް ހިސާބުތަކުން ދައްކާގޮތުގައި ޕްރައިވެޓް އެކްސްޕޯޓްގެ ގޮތުގައި 51.1 މިލިއަން ޑޮލަރުގެ މުދާ އެކްސްޕޯޓް ކޮށްފައިވާއިރު، ޕަބްލިކް އެކްސްޕޯޓްގެ ގޮތުގައި 60.6 މިލިއަން ޑޮލަރުގެ މުދާ ވަނީ އެކްސްޕޯޓްކޮށްފަ އެވެ.