ބޭންކް އޮފް މޯލްޑިވްސް (ބީއެމްއެލް) ގެ އައްޑޫ ހުޅުދޫ ބްރާންޗްގެ ބިންގާ އަޅައިފިއެވެ.

އެ ބްރާންޗުގެ ބިންގާ އެޅީ ރައީސް ޑރ. މުހައްމަދު މުއިއްޒު މިހާރު ހުޅުދު އާއި މީދު އަށް ކުރައްވާ ދަތުރުގެ ތެރެއިންނެނެވެ.

ހުޅުދޫ ބްރާންޗްގެ ބިންގާ އަޅުއްވައި ދެއްވީ ބީއެމްއެލްގެ ސީއީއޯ މުހައްމަދު ޝަރީފާއި ލޯކަލް ގަވާމެންޓް މިނިސްޓަރު އާދަމް ޝަރީފެވެ. އެ ރަސްމިއްޔާތުގައި ރައްޔިތުންގެ މަޖިލީހުގެ ހުޅުދޫ ދާއިރާގެ މެންބަރު މުހައްމަދު ޝާހިދު ވެސް ބައިވެރިވެވަޑައިގަތެވެ.

ބީއެމްއެލުން ހުޅުދޫގައި ހަދާނީ އިސްލާމިކް ބްރާންޗެކެވެ.

އެ ރަށުގައި ބީއެލްއެމްގެ ބްރާންޗެއްގެ ބިންގާ އެޅި އިރު، މިހާތަނަށް ގައުމީ ބޭންކްގެ ހިދުމަތް ހުޅުދު އާއި މީދޫގައި ދެމުން އައީ މީދޫގައި އިމާރާތްކޮށްގައި ހުރި ބްރާންޗުންނެވެ.

މީދޫގެ އިތުރުން އައްޑޫގައި މިހާރު ބީއެމްއެލްގެ ބްރާންޗްތައް ހުންނަނީ ހިތަދު އާއި މަރަދޫފޭދޫގަ އެވެ.

ހުޅުދޫގައި މިއަދު ވަނީ ބީއެމްއެލްގެ އޭޓީއެމެއް ވެސް ހުޅުވައިފައެވެ.