ދައުލަތުން އިއްޒަތް އަރުވާފައިވާ ބޭފުޅުންނަށް ހެލްތު އިންޝުއަރެންސް ދިނުމަށް އަންނަ އަހަރަށް ލަފާކުރާ ދައުލަތުގެ ބަޖެޓްގައި ހިމަނަައިފިއެވެ.
ފިނޭންސް މިނިސްޓަރު މޫސާ ޒަމީރު ރައްޔިތުންގެ މަޖިލީހަށް ހުށަހެޅުއްވި ބަޖެޓުގައި ދައުލަތުން އިއްޒަތް އަރުވާފައިވާ ބޭފުޅުންނަށް އިންޝުއަރެންސް ދިނުމަށް 1.2 މިލިއަން ރުފިޔާ ހިމަނާފައިވެއެވެ.
މިއީ ރާއްޖޭގެ ތާރީޚްގައި ވެސް އެ ބޭފުޅުންނަށް އެފަދަ އިނާޔަތެއް ދެއްވަން ނިންމެވި ފުރަތަމަ ފަހަރެވެ. ކުރިއަށް އޮތްތަނުގައި ކޮންމެ އަރަހަކު ވެސް މި އިނާޔަތް ދިނުމަށް ސަރުކާރުން ވަނީ ނިންމާފަ އެވެ.
ދައުލަތުން މިހާރު އަރުވާ އިއްޒަތްތަކަކީ، ދައުލަތުގެ އިއްޒަތް، ދައުލަތުގެ މަތިވެރި އިއްޒަތް އަދި ދައުލަތުގެ އެންމެ މަތިވެރި އިއްޒަތެވެ.
ދައުލަތުގެ އިއްޒަތް މިހާތަނަށް 39 ބޭފުޅަކަށް އަރުވާފައިވެއެވެ. އޭގެ ތެރޭގައި ހިމެނެނީ މަތިވެރި އިއްޒަތް އެރުވި 24 ބޭފުޅަކާއި އިއްޒަތް އެރުވި 12 ބޭފުޅެކެވެ. އަދި އެންމެ މަތިވެރި އިއްޒަތް އެރުވި އެއް ބޭފުޅެއް ވެސް ހިމެނެއެވެ. އެއީ ކުރީގެ ރައީސް މައުމޫން އަބްދުލް ގައްޔޫމެވެ.
ރައީސް ޑރ. މުހައްމަދު މުއިއްޒު ވެރިކަމަށް ވަޑައިގަތްފަހުން ގައުމަށް ޚިދުމަތް ކުރައްވާ ބޭފުޅުންގެ އަގުވަޒަންކުރައްވަން މަސައްކަތް ކުރައްވާކަން ފާހަގަކޮށްލެވެއެވެ.
ކިޔުންތެރިންގެ ހިޔާލު