ސަރުކާރުން އަންނަ އަހަރަށް (2026) ލަފާކޮށް ޖުމްލަ 64.2 ބިލިޔަން ރުފިޔާގެ ބަޖެޓެއް ރައްޔިތުންގެ މަޖިލީހަށް ހުށަހަޅައިފިއެވެ. މާލީ ވަޒީރު މޫސާ ޒަމީރު މަޖިލީހަށް ހުށަހެޅުއްވި މި ބަޖެޓުގެ ޖުމްލަ އަދަދަކީ 64,202,565,720 ރުފިޔާއެވެ.

މި ބަޖެޓުގެ ތަފްސީލުތަކަށް ބަލާއިރު، ޖުމްލަ ޚަރަދުގެ ގޮތުގައި 49.2 ބިލިޔަން ރުފިޔާ ހިނގާނެ ކަމަށް ލަފާކުރެވެއެވެ. މީގެތެރެއިން ރިކަރަންޓް ޚަރަދަށް 39.9 ބިލިޔަން ރުފިޔާ އަދި ކެޕިޓަލް ޚަރަދަށް 9.3 ބިލިޔަން ރުފިޔާ ހިމެނެއެވެ.

އަންނަ އަހަރު ދައުލަތަށް ލިބޭނެކަމަށް ލަފާކުރާ ޖުމްލަ އާމްދަނީ އާއި ހިލޭ އެހީގެ މިންވަރަކީ 40.4 ބިލިޔަން ރުފިޔާ ކަމަށް މާލީ ވަޒީރު ވިދާޅުވިއެވެ.

ބަޖެޓުގެ ބޮޑު ބައެއް، 9.3 ބިލިޔަން ރުފިޔާ، ވަނީ ސުކޫކާއި ބޮންޑު އަނބުރާ ދެއްކުމަށް ޚާއްސަކޮށްފައެވެ. މި ޚަރަދުތައް ނެގުމަށްފަހު އަންނަ އަހަރުގެ ބަޖެޓަކީ 55 ބިލިޔަން ރުފިޔާ ކަމަށް މާލީ ވަޒީރު ވިދާޅުވިއެވެ.
މާލީ ވަޒީރު މޫސާ ޒަމީރު ވިދާޅުވީ، މި ބަޖެޓަކީ ފިސްކަލް އަދި ދަރަނީގެ ދެމެހެއްޓެނިވިކަން އިއާދަކުރުމަށް ގިނަ ފިޔަވަޅުތަކެއް ހިމަނާފައިވާ ބަޖެޓެއް ކަމަށެވެ.

އަދި މިއީ ސަރުކާރަށް ވާރުތަވި ބޮޑެތި ދަރަނިތަކުން ދިވެހިން ސަލާމަތްކޮށް، މުސްތަގްބަލުގެ ޖީލުތަކަށް ބުރަ ބޮޑު ނުވާނެހެން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ތަރައްގީގެ ތަސައްވަރު ކުލަކޮށްދޭނެ ބިންގަލެއް ކަމަށެވެ.

މީގެ އިތުރުން، މި ބަޖެޓު ފަރުމާކޮށްފައިވަނީ ރައްޔިތުންގެ އާންމު ދިރިއުޅުމާ ގުޅިފައިވާ ސިއްހަތު، ތައުލީމު އަދި ހަކަތަ ފަދަ މުހިންމު އަސާސީ ޚިދުމަތްތަކަށް ދެމެހެއްޓެނިވި ހައްލުތަކެއް ގެނެސްދިނުމަށް ކަމަށާއި، ގައުމީ ތަރައްގީގެ މުހިންމު ލަނޑުދަނޑިތަކަށް ހަގީގީ ކުލަވަރު ގެނުވާނެ ބަޖެޓެއް ކަމަށް ވެސް ވަޒީރު ވިދާޅުވިއެވެ.

ބަޖެޓް ބަޔާން ނިންމަވައިލައްވަމުން ވަޒީރު މޫސާ ޒަމީރު ވަނީ، ހުށަހަޅާފައިވާ ގޮތަށް މި ބަޖެޓު މަޖިލީހުން ފާސްކޮށްދެއްވުމަށް އެދިވަޑައިގެންފައެވެ. އަދި ސަރުކާރުން ކުރައްވާ މަސައްކަތްތަކުގައި މަޖިލީހުން ކެއްތެރިކަމާއި ސާބިތު ކަމާއެކު ދެއްވާ އެއްބާރުލެއްވުމަށް ޝުކުރު އަދާކުރެއްވިއެވެ.