ގެދޮރުވެރިޔާ ސްކީމުގެ ދަށުން ދޫކުރާ ފުލެޓުތަކުގެ ތެރެއިން ތިން ޓަވަރެއްގައި ކަރަންޓުގެ ނިޒާމު ފުރިހަމަކޮށްފިއެވެ.

ގެދޮރުވެރިޔާ ސްކީމުގެ ދަށުން އިމާރަތް ކުރަމުން އަންނަ 4،000 ފްލެޓުގެ ތެރެއިން ފްލެޓް ލިބޭ ގިނަ އަދަދެއްގެ ބަޔަކާއެކު ފަހި ދިރިއުޅުން ކޯޕަރޭޝަން (އެފްޑީސީ) އިން މިހާރު ވަނީ އެއްބަސްވުންތައް ހަދައިފައެވެ. އަދި ގުރުއަތު ނެގުމުގައި ކުރިން ބައިވެރިވެފައި ނުވާ މީހުންގެ ގުރުނެގުން ވަނީ ކުރިއަށްގެންގޮސްފައެވެ.

އެފްޑީސީން ބުނީ އަމާން އުދަރެސް 11، 12 އަދި 13ގައި ކަރަންޓުގެ ނިޒާމު ގުޅައި، މިއަދު އިފްތިތާހުކޮށްފައިވާ ކަމަށެވެ. އެ ޓަވަރުތަކަށް ކަރަންޓުގެ ނިޒާމު ގުޅައިދިނީ ސްޓެލްކޯ އިންނެވެ.

26 އޮކްޓޯބަރު 2025، އަމާން އުދަރެސް 11، 12 އަދި 13ގައި ކަރަންޓުގެ ނިޒާމު ގުޅައި އިފްތިތާހުކުރުން — ފޮޓޯ/ ސްޓެލްކޯ
ގެދޮރުވެރިޔާ މަޝްރޫއުގެ ދަށުން ހުޅުމާލޭގެ ދެވަނަ ފިޔަވަހީގައި އެފްޑީސީން އިމާރާތްކޮށްފައިވަނީ ޖުމުލަ 32 ޓަވަރެވެ. އޭގެ ތެރެއިން 16 ޓަވަރަކަށް “އަމާން އުދަރެސް”ގެ ނަން ދީފައިވާ އިރު، އަނެއް 16 ޓަވަރަށް ދީފައިވަނީ “އަމާން ދޯދި”ގެ ނަމެވެ.

އެފްޑީސީން އެންމެ ފަހުން ދީފައިވާ މައުލޫމާތުގައިވާ ގޮތުގައި 4000 ފުލެޓުގެ 90 ޕަސެންޓު މަސައްކަތް ވަނީ ނިންމައިފައެވެ. އަލަށް ވިޔަފާރި ފަށަން ބޭނުންވާ ފަރާތްތަކަށްވެސް އެ ޔުނިޓުތަކުން ކޮމާޝަލް ޖާގަތަކަށް ހުޅުވާލުމަށް ވަނީ ހަމަޖެހިފައެވެ.

ގެދޮރުވެރިޔާ ސްކީމުގެ ދަށުން ދޫކުރާ ފްލެޓްތަކުގެ ތަޅުދަނޑި އަންނަ މަހުގެ ނިޔަލަށް ދޫކޮށް ނިންމުމަށް އެފްޑީސީން އަންނަނީ މަސައްކަތްކުރަމުންނެވެ. އެފްޑީސީން ތަޅުދަނޑި ހަވާލުކުރަމުންދަނީ، ޑިޕޮސިޓް ދައްކާފައިވާ ފަރާތްތަކަށެވެ.

އެފްޑީސީން މީގެ ކުރިން ބުނެފައިވާ ގޮތުގައި، މިމަހުގެ ތެރޭގައި ފުލެޓުތަކަށް މީހުންނަށް ވަދެވޭނެއެވެ.