މާލެއިން ފުރައިގެން ކ. އެރިޔަދޫއަށް ދަތުރުކުރަމުން ދިޔަ ކޮޅުވެއްޓިން ގެއްލުނު ތިން މީހުންގެ ތެރެއިން ދެ މީހަކު މަރުވެފައި އޮއްވާ ފެނިއްޖެއެވެ.

“އަލްމާކް ފިޔަ” ކިޔާ ކޮޅުވެއްޓިއެއް ރޭ ދަންވަރު ބަންޑުން ޖަހާލި ހާދިސާގައި ގެއްލިގެން ހޯދަނިކޮށް މަރުވެފައި އޮއްވައި ފެނުނީ ގއ. ދާންދޫ، ސަރުސޫނުގެ، 38 އަހަރުގެ އަހުމަދު ޝިފާން އާއި އިންޑިއާގެ ރައްޔިތެކެވެ. ދެން ގެއްލިފައި ވަނީ ބަންގްލަދޭޝްގެ ރައްޔިތެކެވެ. އޭނާ ހޯދުމުގެ މަސައްކަތް ކޯސްޓްގާޑުން އަންނަނީ ކުރަމުންނެވެ.

އެ ކޮޅުވެއްޓިން ޖުމްލަ ހަތް މީހުން ދަތުރުކޮށްފައިވާއިރު، ހަތަރު މީހަކު ވަނީ ސަލާމަތްކޮށްފައެވެ.

މި ދުވަސްވަރު ރާއްޖޭގެ އެކި ހިސާބުތަކަށް ވިއްސާރަވެ ކަނޑުތައް އާދަޔާ ހިލާފަށް ގަދަ އެވެ. އެހެންވެ ކަނޑުތައް ގަދަވުމުގެ ސަބަބުން ކޮންމެހެން ކުރަންޖެހޭ ދަތުރެއް ނޫނީ ނުކުރަން ސިފައިންނާއި ފުލުހުން ވަނީ އިލްތިމާސްކޮށްފައެވެ.