ރައީސް ޑރ. މުހައްމަދު މުއިއްޒުގެ ސަރުކާރުން އިއުލާންކުރެއްވި ކައުންސިލުތަކަށް ފަޅުރަށްތައް ދޫކުރުމުގެ ސިޔާސަތުގެ ދަށުން ށ. ކޮމަންޑޫއާ އެ އަތޮޅު ގައްލައިދޫ ހަވާލުކޮށްފިއެވެ.

ކޮމަންޑޫއާ ގައްލައިދޫ ހަވާލުކޮށްފައިވަނީ، ކައުންސިލްތަކަށް ފަޅުރަށްތައް ދޫކުރުމުގެ ސިޔާސަތުގެ ދަށުން، މިދިޔަ އަހަރު ޕްރޮޕޯސަލް ހުށަހެޅުމަށް ފުރުސަތު ހުޅުވާލުމާއެކު ގައްލައިދޫ ހޯދުމަށް ކޮމަންޑޫ ކައުންސިލުން ހުށަހެޅި ޕްރޮޕޯސަލްއާ ގުޅިގެންނެވެ.

ށ. އަތޮޅުގެ ރަށްތަކަށް ރައީސް ކުރައްވަމުންގެންދަވާ ދަތުރުފުޅުގެ ތެރެއިން، ކޮމަންޑޫ ރައްޔިތުންނާ ބައްދަލުކުރެއްވުމަށް މިރޭ ބޭއްވި ޖަލްސާގައި ކޮމަންޑޫ ކައުންސިލާ ވަނީ ގައްލައިދޫ ހަވާލުކޮށްފައެވެ.

އެ ޖަލްސާގައި ކޮމަންޑޫ ކައުންސިލާ، ސަރުކާރުގެ ފަރާތުން ގައްލައިދޫ ހަވާލުކޮށްދެއްވީ ލޯކަލް ގަވަމަންޓް މިނިސްޓަރު އާދަމް ޝަރީފް އުމަރެވެ. އަދި ކޮމަންޑޫ ކައުންސިލުގެ ފަރާތުން އެ ރަށާ ހަވާލުވެވަޑައިގެންނެވީ އެ ކައުންސިލުގެ ރައީސް މުހައްމަދު ސިނާނެވެ.

ރަށްރަށުގެ އިގުތިސާދީ ބޭނުމަށް ކައުންސިލުތަކަށް ފަޅުރަށްތައް ދޫކުރުމުގެ އިތުރުން، ސަރުކާރުން އަންނަނީ ޕިކްނިކް އައިލެންޑުތަކުގެ ގޮތުގައި ވެސް ފަޅުރަށްތައް ހާއްސަކުރަމުންނެވެ.