ކ. ގުރައިދޫގައި ހުންނަ ހާއްސަ އެހީއަށް ބޭނުންވާ މީހުންގެ މަރުކަޒަށް އެހީތެރިކަން ފޯރުކޮށްދިނުމުގެ ގޮތުން ކަސްޓަމްސް އިން ހަރަކާތްތަކެއް ހިންގައިފިއެވެ.

މި ހަރަކާތް ހިންގުނީ ކަސްޓަމްސްގެ 135 ވަނަ އަހަރީ ދުވަހުގެ މުނާސަބާތުގައި ‘ކަސްޓަމްސް-މުޖުތަމަޢުގެ ބައިވެރިއެއް’ ޝިޔާރުގެ ދަށުން ކަމަށް އެ ކުންފުނިން ވަނީ ވިދާޅުވެފައެވެ.

މި ހަރަކާތްތައް ނިންމާލުމުގެ ގޮތުން މިދިޔަ ބުރާސްފަތި ދުވަހު އެ ރަށުގައި ވަނީ ހާއްސަ ހަފްލާއެއް ބާއްވާފައެވެ. މި ހަފްލާ ޝަރަފްވެރިކޮށްދެއްވީ ރައްޔިތުންގެ މަޖިލީހުގެ ކ. ގުރައިދޫ ދާއިރާގެ މެމްބަރު އަލްފާޟިލް ހުސައިން ރިޒާ އާދަމްއެވެ.

މިހަފްލާގައި، ކަސްޓަމްސް މުވައްޒަފުންގެ ފަރާތުން ފޯރުކޮށްދިން އެހީ އެ މަރުކަޒާ ހަވާލުކޮށް، މަރުކަޒުގައި ތިބޭ ފަރާތްތަކަށް ހާއްސަ ހަދިޔާއެއް ވަނީ ހަވާލުކޮށްފައެވެ.

މި ހަރަކާތުގެ ތެރެއިން އެ މަރުކަޒުގެ އާބާތުރަ ފިލުވުމުގެ ގޮތުން ބައެއް އުމްރާނީ މަސައްކަތްތައް ކުރުމާއި، ތަކެތި ހަދިޔާކުރުން ވެސް ކުރިއަށް ގެންދިޔަ ކަމަށް އެ ކުންފުނިން ވަނީ ވިދާޅުވެފައެވެ.

މީގެ އިތުރުން، މަރުކަޒުގައި ހިންގުނު ހަރަކާތްތަކަށް އެކި ގޮތްގޮތުން އެހީތެރިކަން ފޯރުކޮށްދިން ފަރާތްތަކަށް އެ ހަފްލާގައި ހަނދާނީ ފިލައެއް ވެސް ދީފައިވާކަން ފާހަގަކުރެވެއެވެ.