ނުހައްގުން ބަދަލުދިން ކަމަށް ތުހުމަތު ކުރެވޭ މައްސަލައެއްގެ ތަހުގީގަށް ކުރީގެ އިކޮނޮމިކް މިނިސްޓަރު ފައްޔާޒް އިސްމާއީލާއި ކުރީގެ ފިނޭންސް މިނިސްޓަރު އިބްރާހީމް އަމީރު އެންޓި ކޮރަޕްޝަން ކޮމިޝަން (އޭސީސީ)އަށް ހާޒިރުވާން އަންގައިފިއެވެ.

އެ ދެ ބޭފުޅުން ހާޒިރުކުރަނީ ސްވިފްޓް އިންޖިނިއަރިން ޕްރައިވެޓް ލިމިޓެޑަށް ލިބުނު ގެއްލުމުގެ ބަދަލެއްގެ ގޮތުގައި އެކަށީގެންނުވާ ބަދަލެއް ދިނުމަށް އޮލްޓަނޭޓް ޑިސްޕިއުޓް ރެސޮލިއުޝަން ކޮމިޓީން 2019 ވަނަ އަހަރު ނިންމި ނިންމުމާ ގުޅިގެން ކަމަށް އޭސީސީން ފޮނުވި ޗިޓްގައިވެއެވެ.

އެ ޗިޓްގައިވާގޮތުން އެ ކޮމިޓީގެ މެންބަރެއްގެ ހައިސިއްޔަތުން ފައްޔާޒާއި އަމީރަށް ލިބިފައިވާ ރަސްމީ ހައިސިއްޔަތު ނަހަމަގޮތުގައި ބޭނުންކޮށްގެން ސްވިފްޓް ކުންފުންޏަށް ލިބެންނުޖެހޭ މަންފާއެއް ހޯދައިދީފައިވާ ކަމަށް ތުހުމަތުކުރެވެއެވެ.

އެ ދެ ބޭފުޅުން ވެސް ހާޒިރުކުރަނީ އަންނަ ހޯމަ ދުވަހުގެ ހެނދުނުގެ ވަގުތެއްގައެވެ.

މިދިޔަ ސަރުކާރުން ހިންގާފައިވާ ކޮރަޕްޝަންގެ ގިނަ މައްސަލަތަކެއް އޭސީސީން އަންނަނީ ތަހުގީގު ކުރަމުންނެވެ.

އެމްޑީޕީ ސަރުކާރުގައި ފެނަކައިގެ މެނޭޖިން ޑިރެކްޓަރަކަށް ހުންނެވި އަހްމަދު ސައީދު މުހައްމަދު މިހާރު ވަނީ ކޮރަޕްޝަންގެ ދައުވާ ސާބިތުވެ ހަތަރު އަހަރަށް ޖަލަށްލާފައެވެ.