އިސްތިއުމާރީ އިސްރާއީލުގެ ޓެރަރިސްޓުން ކަނު އަނދިރީގައި އައިސް “ގްލޯބަލް ސުމުދް ފްލޮޓިލާ” ގާފިލާއަށް ހުރަސްއެޅުމަށް ހިންގި ޖަރީމާތަކަށްފަހު، ގާފިލާގެ ދަތުރު މިހާރު ކުރިއަށްދާ ކަމަށް ޚަބަރު ލިބެއެވެ.
އިސްރާއީލުގެ ކަނޑުގެ ސިފައިންގެ މަނަވަރަކާއި، އިތުރު ކުދި ބޯޓުތައް ވަނީ، ގާފިލާގެ ވަށައިގެން ދުއްވައި، ހުރަސް އެޅުމުގެ އަމަލުތަކެއް ހިނގްގާއެވެ. ގިނަ ބޯޓުތައް އައީ ލައިޓްވެސް ނިއްވާލައިގެން ކަމަށް، “ގްލޯބަލް ސުމުދް ފްލޮޓިލާ” އިން ބުނެއެވެ.
އަދި އިސްރާއީލުގެ ކަނޑުގެ ސިފައިންގެ މަނަވަރުވަނީ، “ގްލޯބަލް ސުމުދް ފްލޮޓިލާ” ގައި ހިމެނޭ އެންމެ ބޮޑު ބޯޓުކަމަށްވާ “އަލްމާ” އާ ވަރަށް ގާތުން ދުއްވައި ނުރައްކާކޮށްފައެވެ.
އެންމެބޮޑު ބޯޓުތައް ކަމަށްވާ “އަލްމާ” އާއި “ސިރިއަސް” ގެ މުއާސަލާތީ ވަސީލަތް ހަލާކޮށް، ގާފިލާގެ ބޯޓުތަކުގެ މުއާސަލާތީ ޚިދުމަތް ޖޭމްކުރުމުގެ އަމަލުތަކެއްވެސް ހިންގާފައިވާ ކަމަށް، ދަތުރު އިންތިޒާމުކުރާ ފަރާތުން ބުނެއެވެ.
އިސްރާއީލު ސިފައިން 45 ވަރަކަށް މިނެޓް ވަންދެން “ގްލޯބަލް ސުމުދް ފްލޮޓިލާ” އަށް ހުރަސްއެޅުމުގެ އަމަލުތަކެއް ހިންގާފައި ވެއެވެ.
އަދި އިރު އެރުމުގެކުރިން ގާފިލާ ނުފެންނަ ހިސާބަށް ގޮސްފައިވާ ކަމަށްވެސް ބުނެއެވެ.
އިސްތިއުމާރީ ސިފައިން ހިންގި ހުރަސްއެޅުމުގެ އަމަލުތަކުގެ ތެރޭގައި “ގްލޯބަލް ސުމުދް ފްލޮޓިލާ” ގައި ހިމެނޭ އެއްވެސް ބޯޓެއްގެ މީހަކަށް ކަމެއް ނުވާ ކަމަށް ބުނެފައި ވެއެވެ.
ނަމަވެސް، މިއީ، ކުރިއަށްހުރި ވަގުތުތަކުގައި އިސްރާއީލުން ގާފިލާއަށް ހަމަލާދޭން ވެފައިވާ ތައްޔާރީތަކުގެ ބައެއް ކަމަށް އެމީހުން ދެކެއެވެ.
“ގްލޯބަލް ސުމުދް ފްލޮޓިލާ” ގާފިލާގައި 50 އާ ގާތްކުރާ އަދަދަކަށް ބޯޓުތައް ދަތުރުކުރަމުންދާއިރު، އެ ބޯޓުތަކުގައި ދުނިޔޭގެ 46 ގައުމަކަށް ނިސްބަތްވާ 500 އަށްވުރެ ގިނަ މީހުން ދަތުރުކުރަމުން ގެންދެއެވެ.
ބޯޓުތަކުގައި ހިމެނޭ މީހުން ބުނަމުން ގެންދަނީ އެމީހުންނަށް ވަރަށް އަވަހަށް ޣައްޒާގެ އައްސޭރިފަށް ފެންނާނޭ ކަމަށެވެ.
ނަމަވެސް، އޭގެކުރިން އިސްރާއީލުން ގާފިލާއަށް ހަމަލާދޭނޭ ކަމަށް ބެލެވިފައި ވެއެވެ.
ޣައްޒާގެ ހިސާރު ފޫއަޅުވާލަން ކުރިން ދަތުރުކުރި މަދު ބޯޓުތަކަށް އިސްރާއީލު ކޮމާންޑޯއިން އަރައި މީހުން ހައްޔަރުކޮށް، ބޯޓުތައް ފެއްތި ނަމަވެސް، މިފަހަރު ގިނަ ބޯޓުތަކެއްގައި އެތައް ބަޔަކު އަންނާތީ އިސްރާއީލުން ކަންތައް ކުރާނެގޮތެއް އަދިވަނީ ނޭނގުމެއްގެ ތެރޭގައެވެ.
ކިޔުންތެރިންގެ ހިޔާލު