ހެނދުނުން ފެށިގެން މިހާތަނަށް ޣައްޒާއިން ސާޅީހަށްވުރެ ގިނަ މީހުން ޝަހީދު ކޮށްލައިފިއެވެ.

އިސްތިއުމާރީ ޓެރަރިސްޓުން ދެމުންގެންދާ ހަމަލާތަކުގައި އެންމެ ގިނަމީހުން މިއަދު ޝަހީދުކޮށްލާފައިވަނީ ގާޒާ ސީޓީންނެވެ. އެ ސިޓީން އެކަނިވެސް 25 މީހުން ޝަހީދުކޮށްލާފައި ވެއެވެ.

އަދި އިންސާނީ އެހީ ހޯދަން ގޮސްތިއްބައި  ބަޑިޖަހައިވެސް ބަޔަކު ޝަހީދު ކޮށްލާފައި ވެއެވެ.

އިސްތިއުމާރީ ޓެރަރިސްޓުން މިހާރުވެސް ޣައްޒާގެ އެކި ހިސާބުތަކަށް ވަރުގަދަ ވައިގެ ހަމަލާތަކެއް ދެމުންނެވެ. އެންމެ  ވަރުގަދައަށް ބޮންއަޅަމުން ގެންދަނީ ގާޒާ ސިޓީއަށެވެ.

އެގޮތުން، އާންމުންގެ ގެތަކާއި، އާންމުން ދިރިއުޅޭ އިމާރާތްތަކާއި، އެނޫންވެސް ތަންތަނަށް ޖެޓާއި ޑްރޯން ބޭނުންކޮށްގެން ބޮންއަޅަމުން ގެންދާއިރު، އެއްގަމުމަގުންވެސް ގެންދަނީ ހަމަލާތައް ދެމުންނެވެ.

ގާޒާ ސިޓީގެ ތެލް އަލްހަވާއަށް ވެސް ވަރުގަދަ ވައިގެ ހަމަލާތަކެއް ދެމުން ގެންދާއިރު، ޣައްޒާގެ މެދުތެރޭ ނުސައިރަތު ރެފިއުޖީ ކޭމްޕްގައި ހުރި އާންމުން ދިރިއުޅޭ އިމާރާތަކަށްވެސް ބޮންއަޅައި ބޮޑު ގަތުލުއާންމެއް ހިންގާފައި ވެއެވެ. މި ޓެރަރިސްޓު ހަމަލާގައި ކުޑަކުދިންވެސް ޝަހީދުވެފައިވާ ކަމަށް ޣައްޒާގެ ސިއްހީ ފަރާތްތަކުން ބުނެއެވެ.

ގާޒާ ސިޓީގެ އަލް ތުއްފާހް އަވަށަށްވެސް ވަރުގަދައަށް ބޮންއެޅުމުގެ ސަބަބުން ފަސްމީހުން ޝަހީދުވެ، އެތައްބަޔަކު ޒަޚަމްވެފައިވާ ކަމަށް ޚަބަރުތައް ބުނެއެވެ.