ފާދިއްޕޮޅު ނިލަންދޫ ކައުންސިލް އިދާރާގެ އައު އިމާރާތުގެ ބިންގާ އެޅުމުގެ ރަސްމިއްޔާތު މިއަދު ބޭއްވިފައިވަނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ބައިވެރިވެވަޑައިގަތުމާއެކުގައެވެ. މި ރަސްމިއްޔާތަކީ ރައީސުލްޖުމްހޫރިއްޔާ ފާދިއްޕޮޅަށް ކުރައްވަމުން ގެންދަވާ ދަތުރުފުޅުގެ ބައެއްގެ ގޮތުގައި ބޭއްވުނު ޚާއްޞަ ހަފްލާއެކެވެ.

ބިންގާ އެޅުއްވައިދެއްވީ ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާ ބެހޭ ވަޒީރު އާދަމް ޝަރީފު ޢުމަރުއެވެ. މި ރަސްމިއްޔާތުގައި ނިލަންދޫ ދާއިރާގެ މެންބަރު ފާޠިމަތު ސައުދާ އާއި ނިލަންދޫ ކައުންސިލްގެ ރައީސް އަލީ އަޙްމަދު ބައިވެރިވެވަޑައިގަތެވެ.

ނިލަންދޫ ކައުންސިލް އިދާރާގެ އައު އިމާރާތް ބިނާކުރުމަކީ ހަލާކުވެ ބޭނުންނުކުރެވޭ ހާލަތަށް ގޮސްފައިވާ ކައުންސިލް އިދާރާތައް އަލުން ތަރައްޤީކުރުމަށް ސަރުކާރުން ފެށިފައިވާ ބޮޑު މަޝްރޫޢުގެ ތެރެއިން ކުރިއަށްގެންދާ މަސައްކަތެކެވެ. ސަރުކާރުން ވަނީ މި ފަސް އަހަރުގެ ތެރޭގައި 100 އަށްވުރެ ގިނަ ރަށްރަށުގެ ކައުންސިލް އިދާރާތައް އައު ޒަމާނީ އިމާރާތްތަކަށް ބަދަލުކުރުމުގެ އަމާޒު ކަނޑައަޅާފައެވެ.

މި މަޝްރޫޢުގެ ދަށުން އަތޮޅުތެރޭގެ 55 ރަށެއްގެ ކައުންސިލް އިދާރާގެ އައު އިމާރާތްތައް ބިނާކުރުމުގެ މަސައްކަތް ކޮންޓްރެކްޓަރ ފައިނޭންސް އުސޫލުން ކުރިއަށް ގެންދިއުމަށް ރޯޑް ޑިވެލޮޕްމަންޓް ކޯޕަރޭޝަން (އާރްސީސީ) އާ ޙަވާލުކޮށްފައިވާކަމަށް ސިޓީތަކާބެހޭ ވުޒާރާއިން ހާމަކުރެއެވެ. މުޅި މަޝްރޫޢުގެ އަގަކީ 631 މިލިޔަން ރުފިޔާއެވެ.

ސިޓީތަކާބެހޭ ވުޒާރާއިން ވިދާޅުވި ގޮތުގައި، މި މަޝްރޫޢުގެ ދަށުން ބިނާކުރާ ކޮންމެ ކައުންސިލް އިދާރާއެއްގެ ވަށާފާރު ރޭނުމާއި އޮފީސް ހިންގުމަށް ބޭނުންވާ ފަރުނީޗަރު ފޯރުކޮށްދިނުން ހިމެނިފައިވެއެވެ.