އައްޑޫ ގަން އިންޓަރނޭޝަނަލް އެއަރޕޯޓް ތަރައްޤީކުރުމުގެ މަޝްރޫޢުގެ ދަށުން ގަމުގެ މަގުތައް ތަރައްޤީކުރުމުގެ މަސައްކަތް ނިމުމަކަށް ގެނެވިއްޖެއެވެ. މި މަޝްރޫޢުގެ ދަށުން ޖުމްލަ 4.3 ކިލޯމީޓަރުގެ މަގުތައް ވަނީ ތަރައްޤީކުރެވިފައެވެ.

އައްޑޫ ސިޓީ ގަން އިންޓަރނޭޝަނަލް އެއަރޕޯޓަކީ ދެކުނުގެ ތަރައްޤީއަށް އިންތިހާއަށް މުހިންމު މަޝްރޫޢެކެވެ. އައްޑޫގައި ފަތުރުވެރިކަން ކުރިއެރުވުމަށް ވޭތުވެދިޔަ އެކި ސަރުކާރުތަކުން މަސައްކަތްތަކެއް ކުރައްވާފައިވީ ނަމަވެސް، އެކަން އެކަށީގެންވާ ގޮތެއްގައި ކުރިއަށް ނުދިއުމުގެ މައިގަނޑު ސަބަބެއްކަމުގައި އެކި ފަރާތްތަކުން ފާހަގަކުރައްވަނީ އައްޑޫގެ އެއަރޕޯޓު ރަނގަޅު ފެންވަރަކަށް ތަރައްޤީވެފައި ނެތުމެވެ. މިކަމަށް ޙައްލެއް ހޯދުމުގެ ގޮތުން، އިންޑިއާގެ ލައިން އޮފް ކްރެޑިޓްގެ ދަށުން އައްޑޫ ގަން އިންޓަރނޭޝަނަލް އެއަރޕޯޓު ތަރައްޤީކުރުމުގެ މަސައްކަތް ވަނީ ފެށިފައެވެ.

އައްޑޫ އިންޓަރނޭޝަނަލް އެއަރޕޯޓް ކޮމްޕެނީގެ މެނޭޖިންގ ޑިރެކްޓަރ މުޙައްމަދު ވަޙީދު ޙުސައިން ވިދާޅުވީ މަގުތަކުގައި ތާރުއެޅުމުގެ މަސައްކަތް ނިމިފައިވާ ކަމަށާއި، މިހާރު ކުރިއަށްދަނީ މަގުތަކުގައި ކުރަހަންޖެހޭ ޓްރެފިކް ނިޝާންތައް ކުރެހުމުގެ މަސައްކަތްތައް ކަމަށެވެ.

މެނޭޖިންގ ޑިރެކްޓަރ އިތުރަށް ވިދާޅުވީ، އެއަރޕޯޓުގައި މިވަގުތު ކުރިއަށްދާ އެންމެ މައިގަނޑު މަސައްކަތަކީ އެއަރޕޯޓުގެ ޓަރމިނަލްގެ ދެފަރާތަށް އިތުރުކުރާ އެކްސްޓެންޝަން ޓަރމިނަލް ޢިމާރާތުގެ މަސައްކަތް ކަމަށެވެ. މިގޮތުން އެއްފަޅިއަށް 15 މީޓަރު އަދި އަނެއް ފަޅިއަށް 75 މީޓަރުގެ ޢިމާރާތެއް މިހާރު ހުރި ޓަރމިނަލްގެ ދެފަރާތުން ތަރައްޤީކުރަމުންދާ ކަމަށް އޭނާ ފާހަގަކުރެއްވިއެވެ. އަދި ތާވަލުގައިވާ ގޮތުން މިއަހަރުގެ ނިޔަލަށް މަސައްކަތް ނިންމުމަށް ރޭވިފައިވީ ނަމަވެސް، އެއަށްވުރެ މަސައްކަތް ދިގުލައިގެން ދިއުމުގެ ފުރުސަތު އޮތްކަންވެސް އޭނާ ފާހަގަކުރެއްވިއެވެ.