ބިދޭސީއެއްގެ ގައިގައި ލޮރީއަކުން ޖެހި ހާލު ސީރިއަސް ވެގެން އައިޖީއެމްއެޗްގައި ފަރުވާދޭން ފަށައިފިއެވެ.
ފުލުހުން ބުނީ ކ. ތިލަފުށީގައި އެކްސްކަވޭޓަރެއްގެ ކައިރީގައި މަސައްކަތް ކުރަން ހުރި މީހެއްގެ ގައިގައި ލޮރީއަކުން ޖެހި، އޭނާގެ ގައިމަތިން އެ ލޮރީ ގޮސްފައިވާ މައްސަލަ މިއަދު 14:15 ގައި ފުލުހުންނަށް ރިޕޯޓުކޮށްފައިވާ ކަމަށެވެ.
އެގޮތުން އެ އެކްސިޑެންޓުގައި އަނިޔާވީ ސްރީ ލަންކާގެ ފިރިހެނަކަށް ކަމަށް ފުލުހުން ބުނެފައި ވެއެވެ.
“އެ މީހާ އަށް އައިޖީއެމްއެޗުގައި ފަރުވާދެމުން އަންނައިރު އޭނާ އަށް ވަނީ ސީރިއަސް އަނިޔާތަކެއް ވެފައި“ ފުލުހުން ބުނެފައި ވެއެވެ.
އެ ހާދިސާގައި ލޮރީ ދުއްވަން އިން އިންޑިއާގެ އުމުރުން 28 އަހަރުގެ ވިގްނޭޝް އަނަދުރާއީ ވަނީ ހައްޔަރުކޮށްފައެވެ. މީގެ އިތުރުން އޭނާ ދުއްވި ލޮރީ ވެސް ވަނީ ޓޯކޮށްފައި ކަމަށް ފުލުހުން ބުންޏެވެ.
ފުލުހުން ބުނީ މި މައްސަލަ އިތުރަށް ތަހުގީގު ކުރަމުން އަންނަ ކަމަށެވެ.
ކިޔުންތެރިންގެ ހިޔާލު