ގެއްލިގެން ހޯދަމުންދަނިކޮށް ފެނުނު “ކޮލަމާ” ބޯޓުގެ ކެޕްޓަން މަރުވެއްޖެއެވެ.

ފުލުހުން ބުނީ ކޮލަމާ ބޯޓު ގެއްލުނު ކަމުގެ ރިޕޯޓުކޮށްފައިވަނީ މިއަދު މެންދުރުފަހު 1:25 ހާއިރު ކަމަށެވެ. އެ ބޯޓު މިހާރު ފެނިފައިވާ ކަމަށާއި ބޯޓު ފެނިފައިވަނީ އެކެފަރަ ސަރަހައްދުން ކަމަށެވެ.

ބޯޓު ފެނުނުއިރު ބޯޓުގެ ކެޕްޓަން، ގއ. ކޮލަމާފުށި، ދޮންވެލި، އާދަމް ސައީދު (60އ) އޮތީ ހަބަރު ހުސްވެފައި ކަމަށާއި އޭނާ ގއ. ވިލިނގިލީ ހޮސްޕިޓަލަށް ގެންދިޔައިރުވެސް މަރުވެފައިވާ ކަމަށް ހޮސްޕިޓަލުން މައުލޫމާތުދޭ ކަމަށް ފުލުހުން ބުންޏެވެ.

ކޮލަމާ ބޯޓު ގެއްލުނީ މުދާ ހިފައިގެން ލ. އަތޮޅުން ހުވަދުއަތޮޅަށް ދަތުރުކުރަމުންދަނިކޮށެވެ.

ފުލުހުން ބުނީ މި މައްސަލަ މިހާރު ތަހުގީގު ކުރަމުން އަންނަ ކަމަށެވެ.