ފަލަސްތީނުގެ ޣައްޒާގައި އިސްރާއީލީ އަސްކަރިއްޔާގެ ސިފައިންގެ މީހަކު މަރުވެއްޖެއެވެ. އިސްރާއީލީ އަސްކަރިއްޔާއިން ކުރިއަށް ގެންދިޔަ ތަޙްޤީޤުން ހާމަވި ގޮތުގައި، މި މަރުގެ ހާދިސާ ހިނގާފައިވަނީ އެ ފަރާތުން ހަރުކޮށްފައިވާ ބޮމެއް ގޮވުމުގެ ސަބަބުންނެވެ. އެހެންނަމަވެސް، މި ބޮން ގޮވުމަށް މެދުވެރިވި ސަބަބު އަދި ވަނީ ހާމަކުރެވިފައެއް ނޫނެވެ.
އިސްރާއީލީ އަސްކަރިއްޔާއިން ހާމަކުރި މަޢުލޫމާތުގައިވާ ގޮތުން، މި ހާދިސާގައި މަރުވެފައިވަނީ ޝިމްޝިމްޝޮން ބެޓަލިއަންގެ ފީރް ބްރިގޭޑުގެ ޕްލެޓޫން ކޮމާންޑަރު، ލެފްޓިނެންޓް އޮރި ގާލިކް (20 އަހަރު) އެވެ. މި ހާދިސާ ހިނގާފައިވަނީ ޣައްޒާގެ ޚާން ޔޫނިސް ސަރަޙައްދުގައެވެ.
މި މަރުގެ ހާދިސާއާ ގުޅިގެން، 2023 ވަނަ އަހަރުގެ އޮކްޓޫބަރު މަހުގެ 7 ވަނަ ދުވަހުން ފެށިގެން މިހާތަނަށް ޣައްޒާގައި މަރުވެފައިވާ އިސްރާއީލީ ސިފައިންގެ އަދަދު 899 އަށް އަރާފައިވާ ކަމަށް އިސްރާއީލީ އަސްކަރިއްޔާއިން ވަނީ ހާމަކޮށްފައެވެ. ނަމަވެސް، ބައެއް ރިޕޯޓުތަކުގައި ފާހަގަކޮށްފައިވާ ގޮތުގައި މި އަދަދު މިއަށްވުރެ އިތުރުވެދާނެ ކަމަށް ލަފާކުރެވެއެވެ.
މި ހަނގުރާމައިގެ ތެރޭގައި އިސްރާއީލީ ސިފައިން ކުރިއަށް ގެންދާ ޚާއްޞަ އޮޕަރޭޝަންތަކުގައި ވެސް އެ ޤައުމުގެ ސިފައިންތަކެއް މަރުވެފައިވާކަން ފާހަގަކުރެވެއެވެ. މީގެ ތެރޭގައި އިމާރާތްތައް ވައްޓާލުމަށް ބޮން ހަރުކުރުމުގެ ސަބަބުން މަރުވެފައިވާ ސިފައިން ވެސް ހިމެނެއެވެ.
ކިޔުންތެރިންގެ ހިޔާލު