ފަގީރުންނަށްދޭ މިންވަރު އިތުރުވާގޮތަށް ޒަކާތުގެ ނިޒާމު ބަދަލުކުރަމުން ގެންދަވާ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެއެވެ.
މިނިސްޓަރު މިހެން ވިދާޅުވީ މޯލްޑިވްސް ޒަކާތު ހައުސްއިން އިންތިޒާމުކޮށްގެން ބާއްވާ ބައިނަލްއަގުވާމީ ޒަކާތު މަހާސިންތާގެ ދެވަނަ ބައްދަލުވުން ފައްޓަވައި ދެއްވަމުން މިއަދު ދެއްކެވި ވާހަކަ ފުޅުގައެވެ.
ޑރ. ޝަހީމް ވިދާޅުވީ ޒަރޫރީ ބޭނުންތައްވެސް ފުއްދައިދޭގޮތަށް ޒަކާތުގެ ނިޒާމު ބަދަލު ކުރެއްވުމުގެ މަސައްކަތް ކުރިއަށް ގެންދަވާ ކަމަށެވެ.
މިދިޔަ އަހަރު ބޭއްވި ފުރަތަމަ މަހާސިންތާއިން ލިބުނު އިލްމީ ރައުޔާއި އިރުޝާދުތަކަށް ބިނާކޮށް، ޒަކާތުގެ ނިޒާމު، އެގޮތަށް ބައްޓަންކުރަމުން ގެންދާއިރު، ނިޒާމު ހަރުދަނާކޮށް، ތަރައްގީކުރުމަށް މިފަަހރުގެ މަހާސިންތާގައި ވެސް މުހިންމު މަޝްވަރާތަކެއްކޮށް މުހިއްމު މައުލޫމާތުތަކެއް ލިބިގެންދާނެ ކަަމށްވެސް ޝަހީމް ވިދާޅުވިއެވެ.
މަހާސިންތާގެ މުހިއްމުކަން ހާމަކުރައްވައި ޝަހީމް ވިދާޅުވީ ރާއްޖޭގެ ޒަކާތުގެ ގާނޫނު އެކުލަވާލީވެސް، ފުރަތަމަ ޒަކާތު މަހާސިންތާއިން ލިބުނު މަޝްވަރާތަކުގެ އަލީގައި ކަމަށެވެ.
އެގޮތުން ރައްޔިތުންގެ މަޖިލީހަށް ހުށައަޅާފައި މިހާރު އޮތް ޒަކާތުގެ ބިލަކީ މިހާތަނަށް ހޯދުނު އެންމެ ފަހުގެ މައުލޫމާތުތަކާއި ކުރެވުނު ތަޖުރިބާތަކުގެ އަލީގައި އެކުލަވާލާފައިވާ ބިލެއް ކަމަށް ވިދާޅުވިއެވެ.
ޝަހީމް ވިދާޅުވީ، ދުނިޔޭގެ އެހެން ގައުމުތަކުން އެކުލަވާލާފައިވާ ޒަކާތުގެ ގާނޫނުތަކުގައި ނެތް ބައެއް ބައިބައި، ރާއްޖޭގެ ޒަކާތުގެ ގާނޫނުގައި ހިމެނޭނެ ކަމަށެވެ.
ޒަކާތުގެ ނިޒާމު ހަރުދަނާކުރުމުުގެ މަސައްކަތުގެ ތެރެއިން ފަގީރުންނާއި މިސްކީނުންނަށް އިތުރަށް އެހީ ފޯރުކޮށްދިނުމަށް ވިސްނަވާކަން ހާމަކުރައްވައި، މިނިސްޓަރު ވިދާޅުވީ، ފަގީރު މީހާއަށް ދިރިއުޅުމުގައި ބޭނުންވާ ޒަރޫރީ ކަންކަމަށް އެހީ ދިނުމުގެ ތަސައްވުރެއް އެކުލަވާލުމުގެ މަސައްކަތް ކުރަމުން އަންނަ ކަމަށެވެ.
އެކަމުގެ ސަބަބުން ހެޔޮ މުޖުތަމައެއް ބިނާކުރުމަށް ފުދިގެންދާނެ ކަމަށްވެސް ވިދާޅުވިއެވެ.
ކިޔުންތެރިންގެ ހިޔާލު