ލ. ކައްދޫގައި ރޭ ހިނގި ނުރައްކާތެރި އެކްސިޑެންޓެއްގައި އަނިޔާވި މީހަކު ނިޔާވި މައްސަލައާ ގުޅިގެން ސައިކަލް ދުއްވި މީހާ ހައްޔަރުކޮށްފިއެވެ.
ފުލުހުން ބުނީ ކައްދޫގައި ރޭ ހިނގި އެ އެކްސިޑެންޓުގައި އަނިޔާވި 64 އަހަރުގެ އަންހެން މީހާ ލ. ގަމު ރީޖަނަލް ހޮސްޕިޓަލުގައި ފަރުވާދެމުން ދަނިކޮށް ނިޔާވެފައިވާ ކަމަށް އެ ހޮސްޕިޓަލުން މައުލޫމާތު ދީފައިވާ ކަމަށެވެ.
އެކްސިޑެންޓް ހިނގާފައިވަނީ ރޭ 7:20 ހާއިރު ލ. ފޮނަދޫން ގަމަށް ދަތުރުކުރި ސައިކަލެއް، ކައްދޫ އެއާޕޯޓް ސަރަހައްދުން މަގު ހުރަސްކުރި ދެ މީހެއްގެ ގައިގައި ޖެހިގެންނެވެ. އެ އެކްސިޑެންޓުގައި ނިޔާވީ މަގު ހުރަސްކުރަނިކޮށް ސައިކަލުން ޖެހި އަނިޔާވި އަންހެން މީހާއެވެ.
އެ އެކްސިޑެންޓުގައި ނިޔާވި އަންހެން މީހާގެ ބޮލަށާއި ފަޔަށް ވަނީ ބޮޑެތި އަނިޔާތަކެއް ލިބިފައެވެ. އަންހެން މީހާގެ އިތުރުން، ދެން އަނިޔާވެފައިވަނީ އޭނާގެ މާމަ ދަރިއަށެވެ. އޭނާގެ ހާލު ވެސް ސީރިއަސްއެވެ.
ބައެއް ފަރާތްތަކުން މައުލޫމާތުދީފައިވާ ގޮތުގައި އެ ސައިކަލަކީ ބާރު ސްޕީޑުގައި ދުއްވާ ސައިކަލެކެވެ.
ފުލުހުން ބުނީ އެ މައްސަލައާ ގުޅިގެން ހައްޔަރުކުރީ ލ. ފޮނަދޫ، ހޯރަ ވިލާ، މުހައްމަދު ނައުސާން، 37، ކަމަށެވެ. އޭނާގެ ބަންދަށް ކޯޓުން ވަނީ 15 ދުވަސް ދީފައެވެ.
ކިޔުންތެރިންގެ ހިޔާލު