ފުލުހުންގެ ފެމިލީ އެންޑް ޗައިލްޑް ޕްރޮޓެކްޝަން ބިލްޑިންގގެ މަސައްކަތް ނިންމުމަށް، މިނިސްޓްރީ އޮފް ސިޓީސް، ލޯކަލް ގަވަރމަންޓް އެންޑް ޕަބްލިކް ވަރކްސްގެ މުވައްޒަފުން ކުރަމުންދާ މަސައްކަތް މިނިސްޓަރު އާދަމް ޝަރީފު އުމަރު ބައްލަވައިލައްވައިފިއެވެ.

އެއީ ކުރީގެ ރައީސް އަބްދުﷲ ޔާމީން ޢަބްދުލްޤައްޔޫމުގެ ސަރުކާރުން ފަށާ، ކޮންކްރީޓް މަސައްކަތް ނިންމާފައިވާ އިމާރާތެކެވެ. މިދިޔަ ސަރުކާރުގައި ވެސް އެ އިމާރާތުގެ މަސައްކަތް ކުރިއެވެ. ނަމަވެސް ވެރިކަން ނިމުނުއިރު މަސައްކަތް ނިންމާލެވިފައެއްނުވެއެވެ.

ކުރީގެ ދެ ސަރުކާރަށް ނިންމާނުލެވުނު އެ އިމާރާތުގެ މަސައްކަތް އަވަހަށް ނިންމުމަށް ޖުލައި މަހުގެ ތެރޭގައި މި ސަރުކާރުން ވަނީ ފަށާފައެވެ. އެ މަސައްކަތް ކުރިއަށްގެންދަނީ މިނިސްޓަރު އާދަމް ޝަރީފްގެ ބެއްލެވުމުގެ ދަށުންނެވެ.

އެ މިނިސްޓްރީން މަސައްކަތް ކުރަމުންދަނީ ވީހާވެސް އަވަހަކަށް އެ އިމާރާތުގެ ހުރިހާ މަސައްކަތެއް ނިންމައި ފުލުހުންނާ ހަވާލުކުރުމަށެވެ.