އިނގިރޭސިވިލާތުގައި ޖިންސީ ގޯނާގެ މައްސަލައެއްގައި ހުކުމްކުރި މީހަކީ ދިވެއްސެއް ނޫން ކަމަށް މޯލްޑިވްސް އިމިގްރޭޝަނުން ބުނެފިއެވެ.

ބޭރުގެ މީޑިއާތަކުން އިއްޔެ ރިޕޯޓުކޮށްފައިވާ ގޮތުގައި މަސާޖު ޕާލާއެއްގައި އަންހެނަކަށް ޖިންސީ ގޯނާކުރިކަމުގެ ދައުވާ ސާބިތުވީ މީހަކީ ދިވެއްސެކެވެ. “ސަންދަރިލިންގަމް ކޫޑަލިންގަމް” ނަމަކަށް ކިޔާ އެ މީހާއަށް އިނގިރޭސިވިލާތުގެ ކޯޓަކުން އިއްވީ ހަތަރު އަހަރު ޖަލު ހުކުމެކެވެ.

އިމިގްރޭޝަނުން މިއަދު ނެރުނު ބަޔާނެއްގައި ބުނީ އެ މައްސަލައާ ގުޅިގެން ލަންޑަންގެ ކޯޓަކުން ހުކުމްކޮށްފައިވާ އެ މީހާއަކީ ދިވެހި ސަރުކާރުގެ ކަމާ ގުޅުންހުރި އެއްވެސް އިދާރާއެއްގައި ދިވެހި ރައްޔިތެއްގެ ގޮތުގައި ރެކޯޑު ކުރެވިފައިވާ މީހެއް ނޫން ކަމަށެވެ.

އެފަދަ މައްސަލަތަކުގައި ސައްހަ ނޫން މައުލޫމާތު ނުވަތަ ފަރުވާލެއްނެތި ކަމެއް އޮޅިގެން ހިނގައިދާނެ ފަދަ މައުލޫމާތު ނުފެތުރުމަށް އެންމެހައި ފަރާތްތަކަށް އިލްތިމާސްކުރާ ކަމަށް އިމިގްރޭޝަންގެ ބަޔާނުގައި ބުންޏެވެ.