ހުޅުމާލެ ހޮސްޕިޓަލުގައި ވެސް އަންނަ މަހު އައިނު ފިހާރަ ހުޅުވާނެ ކަމަށް މާލޭ ސިޓީ ގްރޫޕް އޮފް ހޮސްޕިޓަލްސްގެ ސީއީއޯ އަބްދުއްރައްޒާގު ހަލީމް ވިދާޅުވެއްޖެއެވެ.
އައިޖީއެމްއެޗްގައި މިއަދު ވަނީ އައިނު ފިހާރަ، “އެމްސީޖީއެޗް އޮޕްޓިކަލްސް” ހުޅުވައިފައެވެ. މިއަދު ބޭއްވި ރަސްމިއްޔާތެއްގައި އެ ފިހާރަ ހުޅުއްވައިދެއްވީ ރައީސް ޑރ. މުހައްމަދު މުއިއްޒެވެ.
އައިނު ފިހާރަ ހުޅުވުމަށް މިއަދު ބޭއްވި ރަސްމިއްޔާތުގައި ވާހަކަދައްކަވަމުން ހަލީމް ވިދާޅުވީ އައިނު ފިހާތަކުން އާސަންދައިގައި ހިމެނޭ 2،000 ރުފިޔާގެ ތެރެއިން ކޮންމެ ރައްޔިތަކަށް ވެސް ހިލޭ އައިނު ހެއްދޭނެ ކަމަށާއި ކުރިއަށްއޮތްތަނުގައި އެމްސީޖީއެޗް އޮޕްޓިކަލްސްގެ އިތުރު ފިހާރަތައް ވެސް ހުޅުވިގެންދާނެ ކަމަށެވެ.
އަންނަ މަހުގެ ތެރޭގައި ހުޅުމާލޭގައި ދިރިއުޅޭ ރައްޔިތުންނަށް ވެސް އެ ފަސޭހަ ފޯރުކޮށްދިނުމަށްޓަކައި ހުޅުމާލޭ ހޮސްޕިޓަލުގައި ވެސް އައިނު ފިހާރަ ގާއިމުކޮށް، ހިދުމަތްދޭން ފަށާނެ ކަމަށާއި ކުރިއަށްއޮތް ދުވަސްތަކުގައި މާލޭގެ އިތުރުން އަތޮޅުތަކުގެ ހުރިހާ ރީޖަނަލް ހޮސްޕިޓަލުތަކެއްގައި ވެސް އެމްސީޖީއެޗްގެ ފަރާތުން އައިނުގެ ހިދުމަތް ފޯރުކޮށްދޭނެ ކަމަށް ހަލީމް ވިދާޅުވިއެވެ.
އައިޖީއެމްއެޗްގައި ހުޅުވި އައިނު ފިހާރައިން ހިދުމަތް ފޯރުކޮށްދިން ފުރަތަމަ ތިން މީހުންނަށް މިއަދު ރައީސް ވަނީ އައިނު ހަވާލުކޮށްދެއްވައިފައެވެ.
ކިޔުންތެރިންގެ ހިޔާލު