މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ވަނީ ޤައުމީ ފައިސާގެ މުޢާމަލާތްތަކުގެ ނިޒާމު ޒަމާނީކޮށް ތަރައްޤީކުރުމަށްޓަކައި “ޕޭމެންޓް މޯލްޑިވްސް” ގެ ނަމުގައި ވަކި ކުންފުންޏެއް އުފެއްދުމުގެ މަސައްކަތް ކުރަމުންދާކަން ހާމަކުރައްވާފައެވެ.

މި މަޢުލޫމާތު އެމްއެމްއޭއިން ހާމަކުރައްވާފައިވަނީ ދިވެހިރާއްޖޭގެ ފަވަރަ ނިޒާމާއި އިންޑިއާގެ ޔޫނިފައިޑް ޕޭމެންޓްސް އިންޓަފޭސް (ޔޫޕީއައި) ގުޅުވާލުމާ ބެހޭގޮތުން ނެރުއްވި ބަޔާނެއްގައެވެ. މި ބަޔާނުގައި އެމްއެމްއޭއިން ވިދާޅުވެފައިވަނީ އިންޑިއާގެ އެންޕީސީއައި އިންޓަނޭޝަނަލް ޕޭމަންޓްސް ލިމިޓެޑް (އެންއައިޕީއެލް) އާއެކު ވެވުނު އެއްބަސްވުމުގެ ސަބަބުން ދެ ޤައުމުގެ ރައްޔިތުންނަށް ފަސޭހަކަމާއެކު މާލީ މުޢާމަލާތްތައް ކުރެވޭނެ މަގު ތަނަވަސްވެގެންދާނެ ކަމަށެވެ.

އެމްއެމްއޭއިން އިތުރަށް ފާހަގަކުރައްވާފައިވާ ގޮތުގައި މި އެއްބަސްވުމުގެ ސަބަބުން ދިވެހިރާއްޖޭގެ ފައިސާގެ މުޢާމަލާތްތަކުގެ އަސާސީ އޮނިގަނޑު ހަރުދަނާވެ، މާލީ ނިޒާމު އިތުރަށް ވަރުގަދަވެގެންދާނެއެވެ. އަދި ފަވަރަ އާއި ޔޫޕީއައި ގުޅުވާލުމުން ފަރުދުންނަށް ރައްކާތެރިކަމާއި އަވަސްކަމާއެކު، އަދި އަގުހެޔޮކޮށް ފައިސާގެ މުޢާމަލާތްތައް ކުރެވޭނެ އިންތިޒާމު ހަމަޖެހިގެންދާނެއެވެ.

މި ޚިދުމަތްތައް ތަޢާރަފުކުރުމަށް ރޭވިފައިވަނީ ދެ މަރުޙަލާއަކަށް ބަހާލައިގެންނެވެ. ފުރަތަމަ މަރުޙަލާގައި، 2026 ވަނަ އަހަރު ނިމުމުގެ ކުރިން، ދިވެހިރާއްޖެއާއި އިންޑިއާގެ ފަރުދުންގެ މެދުގައި ވަގުތުން ވަގުތަށް ފައިސާ ފޮނުވޭނެ ނިޒާމެއް ޤާއިމުކުރެވޭނެއެވެ. ދެވަނަ މަރުޙަލާގައި، ފަރުދުންނާއި ވިޔަފާރިތަކުގެ މެދުގައި ކިއުއާރު ކޯޑު މެދުވެރިކޮށް ފަސޭހައިން މުޢާމަލާތްތައް ކުރެވޭނެ ނިޒާމެއް ތަޢާރަފުކުރެވޭނެއެވެ. މި ޚިދުމަތްތައް ފަރުމާކުރެވިފައިވަނީ ދެ ޤައުމުގެ ދެމެދުގައި ކުރެވޭ މުޢާމަލާތްތަކުގައި އެ ޤައުމެއްގެ އަމިއްލަ ފައިސާ ބޭނުންކުރެވޭނެ ގޮތަށެވެ.

އެމްއެމްއޭއިން އިތުރަށް ހާމަކުރައްވާފައިވާ ގޮތުގައި “ޕޭމެންޓް މޯލްޑިވްސް” އަކީ ބައިނަލްއަޤްވާމީ ފެންވަރުގައި ޤަބޫލުކުރެވޭ ޤައުމީ ފައިސާގެ މުޢާމަލާތްތަކުގެ ނިޒާމެއް ޤާއިމުކޮށް ހިންގުމަށް އުފައްދާ ކުންފުންޏެކެވެ. މި ކުންފުނިން ޒަމާނީ ޓެކްނޮލޮޖީގެ އެހީގައި އައު އީޖާދީ ޚިދުމަތްތައް ތަޢާރަފުކޮށް، މި ދާއިރާގެ މަސައްކަތްތައް ވިލަރެސްކުރާނެއެވެ. މި މޮޑެލްއަކީ ގިނަ ޤައުމުތަކެއްގައި ކާމިޔާބުކަމާއެކު ތަންފީޒުކުރެވެމުންދާ މޮޑެލްއެކެވެ. މި މަޝްރޫޢު ތަންފީޒުކުރުމަށްޓަކައި ޤާނޫނީ އޮނިގަނޑަށް ގެންނަންޖެހޭ ބަދަލުތައް ގެނައުމުގެ މަސައްކަތްވެސް ކުރިއަށްދާކަމަށް އެމްއެމްއޭއިން ފާހަގަކުރައްވާފައިވެއެވެ.