ސިނަމާލެ ބްރިޖުން ދަތުރުކުރި ބައެއްގެ ކަރުގައި ކަންވާރު އެޅި އަނިޔާވެފައިވެއްޖެއެވެ.

ފުލުހުންގެ އޮފިޝަލަކު ވިދާޅުވީ ސިނަމާލެ ބްރިޖުން މާލެއިން ހުޅުމާލެއަށް ދާ ފަޅިން ސައިކަލުގައި ދަތުރުކުރި މީހެއްގެ ކަރުގައި ކަންވާރު ފަޅެއް އެޅި އަނިޔާވެފައިވާކަމުގެ ރިޕޯޓް މިދިޔަ ބުރާސްފަތި ދުވަހުގެ ރޭ ލިބިފައިވާ ކަމަށެވެ.

އެ ހާދިސާއާ ގުޅިގެން އަޅަންޖެހޭ ފިޔަވަޅު އެޅުމަށްޓަކައި ކަމާބެހޭ އިދާރާތަކާ ގުޅިގެން ފުލުހުން އަންނަނީ މަސައްކަތް ކުރަމުންނެވެ.

އެ ހާދިސާގައި އަނިޔާވި މީހާއަށް ހޮސްޕިޓަލްގައި ވަނީ ފަރުވާދީފައެވެ.

އެ ކަންވާރަކީ ބްރިޖްގެ ހިނގާ ސަރަހައްދުގައި މަސް ބޭނުމަށް ބަޔަކު ބޭނުންކުރި އެއްޗެކެވެ. މިއީ އާންމުކޮށް ބައެއް ފަރާތްތަކުން ކުރަމުން އަންނަ ކަމެކެވެ.