އީރާނުގެ ގައުމީ އިސްތިގްލާލާއި ކަރާމާތް ރައްކާތެރިކުރުމަށް އެހީތެރިކަމާއި ތާއީދުދިނުންމަތީ ޗައިނާ އަބަދުވެސް ދެމިއޮންނާނެ ކަމަށް ޗައިނާގެ ފޮރިން މިނިސްޓަރ ވަންގް ޔީ ވިދާޅުވެއްޖެއެވެ.
ޗައިނާގެ ފޮރިން މިނިސްޓަރ މިހެން ވިދާޅުވީ، ޗައިނާގެ ޓިއަންޖިންގައި ނިމިގެންދިޔަ ޝަންހާއީ ކޯޕަރޭޝަން ކައުންސިލްގެ ފޮރިން މިނިސްޓަރުންގެ ބައްދަލުވުމަށް ވަޑައިގެންނެވި އީރާނުގެ ފޮރިން މިނިސްޓަރ އައްބާސް އަރަޚީއާ ވަކިން ބައްދަލުކުރައްވައި ދެއްކެވި ވާހަކަފުޅުގައެވެ.
ހަމަ އެއާއެކު، ބާރުގެ ބޭނުންކުރުމުގެ ސިޔާސަތުތަކާއި، އަދި ބުލީކުރުމާ ދެކޮޅުހެދުމުގައިވެސް އީރާނަށް ތާއީދުކުރުންމަތީ ޗައިނާ ދެމިއޮންނާނެ ކަމުގެ ޔަގީންކަން ފޮރިން މިނިސްޓަރ ވަންގް ޔީ ދެއްވާފައި ވެއެވެ.
ޗައިނާގެ ފޮރިން މިނިސްޓަރު ވިދާޅުވީ، ނިއުކްލިއާ ހަތިޔާރު އުފައްދަން މަސައްކަތް ނުކުރާ ކަމަށް އީރާނުން ބުނާ ބުނުމަށް ޗައިނާއިން އިހްތިރާމްކުރާ ކަމަށާއި، އެހެންނަމަވެސް، ސުލްހަވެރި ބޭނުމަށް ނިއުކްލިއަރ ހަކަތަ އުފެއްދުމުގެ ހައްގު އީރާނަށް ލިބިގެންވާ ކަމަށް ގަބޫލުކުރާ ކަމަށާއި، އެކަމަށް އީރާނުން ކުރާ މަސައްކަތަށް އިހުތިރާމްކުރާ ކަމަށްވެސް، ޗައިނާގެ ފޮރިން މިނިސްޓަރ ޔީ، އީރާނުގެ ފޮރިން މިނިސްޓަރަށް ދެންނެވިއެވެ.
އަދި، މެދުއިރުމަތީގެ ހަމަޖެހުން ދެމެހެއްޓުމާއެކު، އީރާނުގެ ނިއުކްލިއަރ ޕްރޮގްރާމްގެ މައްސަލަ ހައްލުކުރުމަށް ބިނާކުރަނިވި ދައުރެއް އަދާކުރުމަށް ބެއިޖިންގ ތައްޔާރަށް އޮތް ކަމަށްވެސް ވިދާޅުވިއެވެ.
ޗައިނާގެ ފޮރިން މިނިސްޓަރުވަނީ، ޑިޕްލޮމެސީގެ ތެރެއިން ސުލްހަވެރި ހައްލުތައް ހޯދުމަށް އީރާނުން ކުރާ މަސައްކަތްތައް ފާހަގަ ކުރައްވިއެވެ.
ޗައިނާގެ ފޮރިން މިނިސްޓަރ ވަންގް ޔީއާއި، އީރާނުގެ ފޮރިން މިނިސްޓަރ އައްބާސް އަރަޚީއާ ދެބޭފުޅުންގެ ބައްދަލުވުމުގައި، ދެގައުމުގެ ގުޅުމާއި، ސަރަހައްދީ އަދި ބައިނަލްއަގްވާމީ މައްސަލަތަކާ މެދުގައިވެސް މަޝްވަރާ ކުރެއްވި ކަމަށް، ޗައިނާ ފޮރިން މިނިސްޓްރީން ނެރުނު ބަޔާނެއްގައި ހާމަކޮށްފައި ވެއެވެ.
ކިޔުންތެރިންގެ ހިޔާލު