ސަރުކާރުގެ ސިޔާސީ މަގާމުތަކުގެ އަދަދާ ގުޅޭގޮތުން އިދިކޮޅު ފަރާތްތަކުން ދޮގު މައުލޫމާތު ފަތުރަމުންދާ ދަނޑިވަޅެއްގައި، ސިޔާސީ މަގާމުތަކަށް މިހާތަނަށް ޢައްޔަނުކޮށްފައިވަނީ ޖުމްލަ 922 މުވައްޒަފުންކަމަށް ރައީސުލްޖުމްހޫރިއްޔާގެ އޮފީހުން މިއަދު ހާމަކޮށްފިއެވެ.

ރައީސް އޮފީހުން ނެރުނު ބަޔާނެއްގައިވާ ގޮތުން، މި ޢައްޔަނުކުރުންތަކަކީ ޤާނޫނުއަސާސީގެ 115 ވަނަ މާއްދާގެ (ޅ) ގެ ދަށުން ރައީސުލްޖުމްހޫރިއްޔާއަށް ލިބިދޭ ބާރުގެ ދަށުން ކުރައްވާފައިވާ ޢައްޔަނުކުރުންތަކެކެވެ. ސަރުކާރުން މި އަދަދުތައް ހާމަކޮށްފައި މިވަނީ، ސިޔާސީ މަގާމުތަކުގެ އަދަދު ހާހުން މަތީގައި އުޅޭކަމަށް ބުނެ އިދިކޮޅުން ކުރަމުންދާ ތުހުމަތުތަކަށް ރައްދު ދިނުމުގެ ގޮތުންނެވެ.

އެ އޮފީހުން ވަނީ މި 922 މުވައްޒަފުން ޢައްޔަނުކޮށްފައިވާ ގިންތިތަކުގެ ތަފްސީލުވެސް ހާމަކޮށްފައެވެ. އެގޮތުން:

• ވަޒީރުން: 20 ބޭފުޅުން

• ވަޒީރުންގެ ފެންވަރު: 14 ބޭފުޅުން

• ސްޓޭޓް މިނިސްޓަރުން: 93 ބޭފުޅުން

• ސްޓޭޓް މިނިސްޓަރުންގެ ފެންވަރު: 07 ބޭފުޅުން

• ޑިޕިއުޓީ މިނިސްޓަރުން: 216 ބޭފުޅުން

  

• ޑިޕިއުޓީ މިނިސްޓަރުންގެ ފެންވަރު: 20 ބޭފުޅުން

• ސީނިއަރ ޕޮލިޓިކަލް ޑިރެކްޓަރުން: 318 ބޭފުޅުން

• ސީނިއަރ ޕޮލިޓިކަލް ޑިރެކްޓަރުންގެ ފެންވަރު: 08 ބޭފުޅުން

• ޕޮލިޓިކަލް ޑިރެކްޓަރުން: 169 ބޭފުޅުން

• ޕޮލިޓިކަލް ޑިރެކްޓަރުންގެ ފެންވަރު: 04 ބޭފުޅުން

• އެސިސްޓެންޓް ޕޮލިޓިކަލް ޑިރެކްޓަރުން: 04 ބޭފުޅުން

• އެހެނިހެން ސިޔާސީ މަޤާމުތައް: 49 ބޭފުޅުން

ސިޔާސީ މަޤާމުތަކަށް ބޭފުޅުން ޢައްޔަނުކުރުމާއި، ވަކިކުރުމާއި، އަދި އިސްތިޢުފާ ދެއްވުމަކީ ކޮންމެ ރިޔާސީ ދައުރެއްގައިވެސް ހިނގަމުންދާ ކަމެއް ކަމަށާއި އެހެންކަމުން، ސިޔާސީ މުވައްޒަފުންގެ ޖުމްލަ ޢަދަދަށް އަބަދުވެސް ބަދަލު އަންނަމުންދާނެ ކަމަށް އެ އޮފީހުން ބުންޏެވެ.