އެޗްޑީސީގެ މެނޭޖިން ޑިރެކްޓަރު ކަމުން އިސްތިއުފާދެއްވިޔަސް އެޑްވައިޒަރެއްގެ ގޮތުގައި ހުޅުމާލެއަށް ހިދުމަތްކުރަން ބޭނުންވާ ކަމަށް މުހައްމަދު މައުރޫފް ޖަމީލް ވިދާޅުވެއްޖެއެވެ.
ޕީއެސްއެމްއަށް ދެއްވި އިންޓަވިއުއެއްގައި މައުރޫފް ވިދާޅުވީ އެޗްޑީސީއާ ހަވާލުވީ ވެސް އެހާ ގިނަ ދުވަހު މަގާމުގައި ހުންނެވުމުގެ ނިޔަތުގައި ނޫން ކަމަށެވެ.
އޭނާ ވިދާޅުވީ މަގާމާ ހަވާލުވީ ކުރުމުއްދަތެއްގައި ނަމަވެސް ހުޅުމާލެއަށް ޚިދުމަތްކުރަން ބޭނުންވާލެއް ބޮޑުކަމުން ސަރުކާރުގެ ހުށަހެޅުން ގަބޫލުކޮށް މަގާމާ ހަވާލުވީ ކަމަށެވެ.
“މި މަގާމަކީ ވަރަށް ޕްރެޝަރު ބޮޑު މަގާމެއް. މި ސްކޭލް އޮފް އޮޕަރޭޝަން އެކަނި ވެސް އެއީ ވަރަށް ބޮޑު ޕްރެޝަރެއް. މިކަހަލަ މަގާމެއްގައި ހުންނައިރު ހުންނާނެ ހުރިހާ ޕްރެޝަރެއް ވެސް. މި މަގާމާ އެކީގައި އަންނަ އެއްޗެއް އެއީ،” މައުރޫފް ވިދާޅުވިއެވެ.
މަގާމުން ވަކިވިޔަސް އޭނާގެ ހުރި ތަޖުރިބާގެ އަލީގައި ހުޅުމާލެ އަށާއި ގައުމުގެ ތަރައްގީއަށް ޚިދުމަތް ކުރަން ބޭނުންވާ ކަމަށް ވެސް މައުރޫފް ވިދާޅުވިއެވެ.
“އެހެންމާ އެއްކޮށް ދޫކޮށްފައި ދަނީކީއެއް ނޫން. ހުޅުމާލެއަށް ވެސް ހަމަ ކޮންޓްރިބިއުޓް ކުރަން ބޭނުންވޭ. އެޗްޑީސީއަށް ވެސް ކޮންޓްރިބިއުޓް ކުރަން ބޭނުންވޭ. އަދި ރާއްޖޭގެ އެހެން ދާއިރާތަކުގެ ޑިވެލޮޕްމަންޓް އޭރިއާތަކުގައި ކޮންޓްރިބިއުޓް ކުރަން ބޭނުންވޭ އަޅުގަނޑުގެ ޓެކްނިކަލް ޕްރޮފެޝަނަލް ދާއިރާއިން ވެސް،” އޭނާ ވިދާޅުވިއެވެ.
މައުރޫފަކީ ރައީސް މައުމޫން އަބްދުލްގައްޔޫމްގެ ވެރިކަމުގައި ވެސް ހުޅުމާލޭގައި މަސައްކަތް ކުރައްވާފައިވާ ބޭފުޅެކެވެ.
ކިޔުންތެރިންގެ ހިޔާލު