ޒަޔަނިސްޓު އިސްރާއީލުން އީރާނަށް ދިން ހަމަލާތަކުގެ ތެރޭގައި، އީރާނުގެ ވެރިރަށް ތެހެރާނުގައި ހުންނަ “އެވިން ޕްރިޒަން” ނަމަކަށްކިޔާ ޖަލަށްދިން ވަރުގަދަ ވައިގެ ހަމަލާގައި ލިބުނު ގެއްލުންތަކުގެ އިތުރު ތަފްސީލުތައް އީރާނުން މިއަދު ހާމަކޮށްފިއެވެ. އީރާނުން ބުނެފައިވަނީ، ޖަލަށް ދިން ހަމަލާގައި 71 ގައިދީން މަރުވެފައިވާ ކަމަށެވެ. ޖަލަށްދިން ހަމަލާގައި މަރުވި މީހުންގެ އަދަދުތައް އީރާނުން މީގެކުރިން ހާމަކޮށްފައެއް ނުވެއެވެ.
71 ގައިދީން މަރުވެ، އިތުރު އެތައްސަތޭކަ ގައިދީން ޒަޚަމްވި ކަމަށްވެސް އީރާނުން ބުނެފައި ވެއެވެ.
މަރުވި މީހުންގެ ތެރޭގައި، ގައިދީންނާއި، ޖަލު މުވައްޒަފުންނާއި، ސެކިއުރިޓީ ބަލަހައްޓާ ސިފައިންނާއި، ޖަލަށް އެވަގުތު ޒިޔާރަތް ކުރަމުންދިޔަ ގައިދީންގެ އާއިލާތަކުގެ މެމްބަރުންނާއި އަދި އާންމުންވެސް ހިމެނޭ ކަމަށް ވެއެވެ. އީރާނުގެ ޖަލުތަކާބެހޭ އޮފީހުން މިއަދުވަނީ، އިސްރާއީލުގެ ހަމަލާތަކުގައި ޖަލަށް ލިބިފައިވާ ގެއްލުންތައް ދައްކުވައިދޭ ފޮޓޯތައް އާންމުކޮށްފައެވެ.
ފޮޓޯތަކުން ފެންނަގޮތުގައި، އިސްރާއީލުގެ ހަމަލާތަކުގައި ޖަލުގެ ފާރުތަކާއި، ސީލިންގުތައް ވެއްޓި، ތަޅުގަނޑުތައްވެސް ވަނީ ފުނޑުފުނޑުވެފައެވެ. އިސްރާއީލުން ދިން ހަމަލާގައި ޖަލުގެ މެޑިކަލް ސެންޓަރާއި، ވެއިޓިންގ ރޫމްވެސް ހަލާކުކޮށްލާފައި ވެއެވެ.
އީރާނުގެ އެވިން ޖަލަކީ ސިޔާސީ ކުށްވެރިން ހައްޔަރުކޮށްފައި ތިބޭ ޖަލެކެވެ. އެތަނުގައި ތިބި ކުށްވެރިންގެ ތެރޭގައި ނޯބަލް ސުލައިގެ އިނާމު ލިބިފައިވާ ނަރްގިސް މުހައްމަދީވެސް ހިމެނެއެވެ.
މީގެއިތުރުން، ފަރަންސޭސި ރައްޔިތުންނާއި، ބޭރުގެ އެހެން ގައުމުތަކަށް ނިސްބަތްވާ ކުށްވެރިންވެސް އެ ޖަލުގައި ބަންދުކޮށްފައި ތިއްބެވެ.
އިސްރާއީލުން އެވިން ޖަލަށްދިން ވަރުގަދަ ވައިގެ ހަމަލާތަކުގައި 71 ގައިދީން މަރުވި ކަމަށް ހާމަކުރި ނަމަވެސް، މަރުވި މީހުންނަކީ ކޮން ބައެއްކަމެއް އަދި އެމީހުން ނިސްބަތްވާ ގައުމުތަކެއް އީރާނުން އަދި ހާމަކޮށްފައެއް ނުވެއެވެ.
ޖަލަށް ހަމަލާދިނުމަކީ ބައިނަލްއަގްވާމީ އިންސާނިއްޔަތުގެ ގާނޫނާއި، އަދި ޖެނީވާ ކޮންވެންޝަތަކާ ޚިލާފް ހަމަލާތަކެއް ކަމަށް ބުނެ، އެތައް ގައުމަކާއި، އިންސާނީ ހައްގުތަކުގެ އެތައް ޖަމާއަތަކުން އިސްރާއީލު ވަރަށް ބޮޑަށް ކުށްވެރި ކޮށްފައި ވެއެވެ.
އަދި މިއީ، ޒަޔަނިސްޓުން ހިންގި ހަނގުރާމައިގެ ޖަރީމާއެއް ކަމަށްވެސް ބުނެފައި ވެއެވެ.
ކިޔުންތެރިންގެ ހިޔާލު