އިސްރާއީލުގެ ބޮޑުވަޒީރު ބެންޖަމިން ނަތަންޔާހޫގެ މައްޗަށް ހިންގާ ކޮރަޕްޝަންގެ ޝަރީއަތް ފަސްކުރަން ނަތަންޔާހޫ އެދުނު އެދުމަށް އިސްރާއީލުގެ އެޓަނީ ޖެނެރަލް ދެކޮޅު ހަދައިފިއެވެ.

ގާނޫނީ ވަކީލު މެދުވެރިކޮށް، ޝަރީއަތުގެ އަޑުއެހުންތައް ފަސްކޮށްދޭން ނަތަންޔާހޫ އެދުނީ އިއްޔެއެވެ. ސަބަބެއް ކަމަށް ބުނެފައިވަނީ “ސަލާމަތީ ސަބަބުތަކަށްޓަކައި” ކަމަށެވެ. އެއީ، އިސްރާއީލުގެ ސަލާމަތަށް ކުރިމަތިވެފައިވާ ނުރައްކަލާ ކުރިމަތިލުމުގައި އޭނާ އަވަދިނެތި އުޅޭންޖެހުން ކަމަށް ބުނެފައި ވެއެވެ.

އެހެން ނަމަވެސް، އިސްރާއީލުގެ ނޫސްތަކުން މިއަދު ބުނެފައިވަނީ، ނަތަންޔާހޫ އެދުނު އެދުމަށް ޝަރީއަތް ފަސްކުރަން އިސްރާއީލުގެ އެޓަނީ ޖެނެރަލް ވަނީ ދެކޮޅު ހަދާފައެވެ.

އެޓަނީ ޖެނެރަލް ބުނެފައިވަނީ، އަޑުއެހުންތައް ފަސްކޮށްދޭން ނަތަންޔާހޫގެ ފަރާތުން ހުށަހަޅާފައިވާ ކަންކަމަކީ، ދެ ހަފްތާއަށް ތާވަލްކޮށްފައިވާ އަޑުއެހުން ކެންސަލްކުރަން އެކަށީގެންވާ ސަބަބުތަކެއް ނޫން ކަމަށެވެ. އެހެންކަމުން، އަޑުއެހުންތައް ފަސް ނުކުރެވޭނޭ ކަމަށް ބުނެފައި ވެއެވެ.

ނަތަންޔާހޫގެ މައްޗަށް ހިންގާ ކޮރަޕްޝަނާއި، ޚިޔާނާތުގެ ޝަރީއަތް ފެށުމަށް ތާވަލްކޮށްފައިވަނީ މިފެށޭ ހަފްތާގެ ހޯމަދުވަހުއެވެ.

ނަތަންޔާހޫގެ މައްޗަށް 2019 ވަނަ އަހަރު ދައުވާ އުފުލާފައިވަނީ ރިޝްވަތާއި މަކަރާއި ހީލަތާއި އިތުބާރު ކެނޑުމުގެ ދައުވާއެވެ. ނަތަންޔާހޫ ވަނީ ތުހުމަތުތަކަށް އިންކާރުކޮށްފައެވެ.

ނަތަންޔާހޫގެ މައްޗަށް ޝަރީއަތް ފަށަން އިސްރާއީލުން ތައްޔާރުވަމުން ދާއިރު، އެމެރިކާގެ ރައީސް ޑޮނަލްޑް ޓްރަމްޕް ބުދަދުވަހު އޭނާގެ އަމިއްލަ ސޯޝަލް މީޑިއާގައި ޕޯސްޓްކުރި މެސެޖެއްގައި ނަތަންޔާހޫގެ މައްޗަށް ހިންގާ ޝަރީއަތް ކެންސަލް ކުރުމަށް ގޮވާލާފައި ވެއެވެ. ނުވަތަ އޭނާއަށް މައާފްދިނުމަށް ގޮވާލާފައި ވެއެވެ.

ޑޮނަލްޑް ޓްރަމްޕް ބުނީ، ނަތަންޔާހޫގެ މައްޗަށް ހިންގަން އުޅޭ ޝަރީޢަތަކީ ސިޔާސީ ބޭނުމެއްގައި ހިންގާ ޝަރީއަތެއް ކަމަށެވެ.