ޖިނާއީ ކުށްތަކަށް އަރައިގަންނަ ކުޑަކުދިން އަލުން މުޖުތަމަޢުއަށް އަހުލުވެރިކުރުވާ މަރުކަޒު “ހޯޕް އައިލެންޑް” އާއި ދައުލަތުގެ މައި ޖަލު، ސެންޓްރަލް ޕްރިޒަން ކޮމްޕްލެކްސް އިމާރާތްކުރުމަށް ބައިނަލްއަޤްވާމީ ފެންވަރުގެ ކުންފުނިތަކުން ޝައުޤުވެރިކަން ފާޅުކޮށްފައިވާ ކަމަށާއި، މި އަހަރުގެ ޖުލައި މަހުގެ ތެރޭގައި މަޝްރޫޢުގެ ޢަމަލީ މަސައްކަތް ފެށުމަށް މަސައްކަތްކުރަމުންދާ ކަމަށް ހޯމްލޭންޑް ސެކިއުރިޓީ މިނިސްޓަރު އަލްފާޟިލް ޢަލީ އިޙްސާން މަޢުލޫމާތު ދެއްވައިފިއެވެ.
ދައުލަތުގެ މީޑިއާ، ޕަބްލިކް ސަރވިސް މީޑިއާގެ “ރާއްޖެ މިއަދު” ޕްރޮގްރާމުގައި ވާހަކަފުޅު ދައްކަވަމުން މިނިސްޓަރު އިޙްސާން ވިދާޅުވީ، މި ދެ މަޝްރޫޢުއަށް އެކުގައި ޝައުޤުވެރިކަން ފާޅުކުރުމަށް ހަތަރު ކުންފުންޏަކުން ކުރިމަތިލާފައިވާ ކަމަށާއި، މަޢުލޫމާތު ދިނުމުގެ ސެޝަންގައި ބައިވެރިވެ، ޕްރޮޕޯސަލްތައް ހުށަހެޅުމުގެ ފުރުޞަތު މިހާރު އެ ކުންފުނިތަކަށް ދެވިފައިވާ ކަމަށެވެ.
“މީގެ ތެރޭގައި ހިމެނެނީ އެމެރިކާ، ޗައިނާ، މެލޭޝިއާ އަދި ދިވެހިރާއްޖޭގެ ކުންފުނިތަކެކެވެ. މިއީ ވަރަށް ޤާބިލު ކުންފުނިތަކެއް ކަމަށް އަޅުގަނޑުމެންނަށް ފާހަގަކުރެވެއެވެ. އެ ފަރާތްތަކުގެ ފައިނަލް ޕްރޮޕޯސަލްތައް ލިބުމުން، އިވެލުއޭޓްކޮށް، ހޮވޭ ފަރާތަކާ މަސައްކަތް ޙަވާލުކޮށްގެން، އަންނަ ޖުލައި މަހުގެ ތެރޭގައި ޢަމަލީ މަސައްކަތް ފެށުމަށް އަޅުގަނޑުމެން މަސައްކަތްކުރަމުން މި ގެންދަނީ،” މިނިސްޓަރު ވިދާޅުވިއެވެ.
މިނިސްޓަރު އިޙްސާން އިތުރަށް ވިދާޅުވީ، ހޯޕް އައިލެންޑްގެ އަމާޒަކީ ކުށުގެ މާޙައުލުގައި މިހާރު އުޅެމުންދާ ކުދިންނާއި، އަދި ނުރައްކަލަށް ހުށަހެޅިފައިވާ ކުދިން ގެންގޮސް، އެ ކުދިންނަށް ރަނގަޅު ތަޢުލީމު ދިނުމާއި، އެ ކުދިންގެ އަޚްލާޤު ރަނގަޅުކުރުމަށް ކުރަންޖެހޭ މަސައްކަތްތައް ކުރުމާއި، އެ ކުދިންނަކީ ޤައުމަށް ބޭނުންތެރި މުހިންމު ހުނަރުތަކެއް ލިބިފައިވާ ކުދިންނަށް ހެދުން ކަމަށެވެ. އަދި 2027 ވަނަ އަހަރު ނިމުމުގެ ކުރިން ރަށް ޤާއިމުކޮށް، ކުޑަކުދިންނަށް ލިބެންޖެހޭ ޚާއްޞަ ފަރުވާ ފެށުމަކީ މި މަޝްރޫޢުގެ އަމާޒު ކަމުގައި މިނިސްޓަރު ފާހަގަކުރެއްވިއެވެ.
