މޯލްޑިވްސް އިންލޭންޑް ރެވެނިއު އޮތޯރިޓީ (މީރާ) އިން ހާމަކުރި މަޢުލޫމާތުގެ މައްޗަށް ބިނާކޮށް، ބޭންކުތަކުގެ އާމްދަނީން ދައުލަތަށް ލިބުނު ޓެކުހުގެ އަދަދު ފާއިތުވި އަހަރު 51% އަށް އިތުރުވެފައިވާކަން ފާހަގަކުރެވެއެވެ. ބޭންކުތަކުން ދައްތަކުން ދައްކަންޖެހޭ ޓެކުހުގެ މިންވަރަކީ އެ ފަރާތްތަކުގެ ޓެކްސް ބިނާކުރެވޭ އާމްދަނީގެ 25% އެވެ.

އާމްދަނީން ޓެކްސް ނެގުމުގެ ޤާނޫނުގެ ދަށުން ނެގޭ އިންކަމް ޓެކުހުގައި ބޭންކުތަކަކީ ވަކި ޚާއްޞަ ފަރާތްތަކެއްގެ ގޮތުގައި ކަނޑައެޅިފައިވާ ބައެކެވެ. މީރާގެ އެންމެ ފަހުގެ އަހަރީ ރިޕޯޓުގައިވާ ގޮތުން “ބޭންކް އިންކަމް ޓެކްސް” ގެ ގޮތުގައި ލިބުނު އާމްދަނީ 51.9% އަށް އިތުރުވެފައިވެއެވެ.

2024 ވަނަ އަހަރު ބޭންކް އިންކަމް ޓެކްސްގެ ގޮތުގައި މީރާއަށް ލިބިފައިވަނީ 1.4 ބިލިއަން ރުފިޔާއެވެ. މިއީ އަންދާޒާކުރެވުނު 993 މިލިއަން ރުފިޔާއާ އަޅާބަލާއިރު 48% އިތުރު އަދަދެކެވެ. އަދި 2023 ވަނަ އަހަރު ލިބުނު 967 މިލިއަން ރުފިޔާއާ އަޅާބަލާއިރު 51.9% ގެ ކުރިއެރުމެކެވެ.

ބޭންކް އިންކަމް ޓެކްސްގެ އާމްދަނީ އަންދާޒާކުރުމުގައި ބަލާ މައިގަނޑު ދެ ކަމަކީ ކުރީގެ އަހަރުތަކުގައި ބަލައިގަތް އާމްދަނީގެ އެވްރެޖާއި ފައިނޭންޝަލް ސެކްޓަރގެ ޖީޑީޕީ ކުރިއަރާނެ މިންވަރެވެ. ފާއިތުވި އަހަރުތަކާ އަޅާބަލާއިރު 2024 ވަނަ އަހަރު ފައިނޭންޝަލް ސެކްޓަރގެ ޖީޑީޕީ ވަނީ 8.88% އަށް އިތުރުވެފައެވެ