ދިވެހި ފުލުހުންގެ ޚިދުމަތް ހަރުދަނާކުރުމުގައި އެންމެ އިސްކަމެއް ދެއްވާނީ ރައްޔިތުންގެ އިތުބާރު ދެމެހެއްޓުމަށްކަމަށް ކޮމިޝަނަރ އޮފް ޕޮލިސް އިސްމާއިލް ނަވީން ވިދާޅުވެއްޖެއެވެ.
ފުލުހުންގެ ޚިދުމަތާމެދު ގެންގުޅުއްވާ ވިސްނުންފުޅު ހާމަކުރައްވަމުން، ކޮމިޝަނަރ ނަވީން ވިދާޅުވީ އެކްޓިންގ ކޮމިޝަނަރގެ މަޤާމުގައި ހުންނެވިއިރުވެސް އެންމެ އިސްކަމެއް ދެއްވާފައިވަނީ ފުލުހުންގެ ޚިދުމަތާމެދު ރައްޔިތުންގެ އިތުބާރު ދެމެހެއްޓުމަށް ކަމަށެވެ. މިގޮތުން، ރައްޔިތުންގެ ސަލާމަތާއި ރައްކާތެރިކަމާ ގުޅޭގޮތުން ހުރި ކަންބޮޑުވުންތައް ދެނެގަނެ، އެކަންކަން ހައްލުކުރުމަށް ފުލުހުންނަށް ކުރެވިދާނެ ކަންތައްތައް ބައްލަވައި، އެގޮތުގެމަތިން ފުލުހުންގެ މަސައްކަތްތައް އަމާޒުކުރައްވަމުންދާ ކަމަށްވެސް އޭނާ ވިދާޅުވިއެވެ.
ކޮމިޝަނަރ ނަވީން ފާހަގަކުރެއްވި ގޮތުގައި، ފުލުހުންނަށް ހުށަހެޅޭ މައްސަލަތަކުގެ ޙާލަތާ ބެހޭ މަޢުލޫމާތު ނުލިބުމަކީ ގިނަ ފަރާތްތަކުން ލިބޭ ޝަކުވާއެކެވެ. މިކަން އިޞްލާޙުކުރުމަށް މިހާރު މަސައްކަތްކުރަމުންދާ ކަމަށާއި، ފުލުހުންގެ ތަޙްޤީޤުތައް އިތުރަށް ހަރުދަނާކޮށް، ތަޙްޤީޤުގެ ކަންކަން ރައްޔިތުންނަށް ފެންނާނެ ގޮތަށް ބައްޓަންކުރައްވާނެ ކަމަށްވެސް އޭނާ ވިދާޅުވިއެވެ.
“ތަޙްޤީޤުތަކުގެ މަޢުލޫމާތު މިހާރަށްވުރެ ބޮޑަށް ރައްޔިތުންނަށް ފޯރުކޮށްދިނުމަކީ ވަރަށް މުހިންމު ކަމެކެވެ. މިއީ އަޅުގަނޑުމެން ކުރިމަތިލާންޖެހޭ ގޮންޖެހުމެކެވެ. މިހާރު ތަޙްޤީޤުތައް ވަނީ ވަރަށް ބޮޑަށް ސިއްރުވެފައެވެ. އެހެންކަމުން، އަޅުގަނޑުމެންގެ ތަޙްޤީޤުތައް އަލުން ބައްޓަންކުރުމަކީ އަޅުގަނޑުމެންނަށް ކުރިމަތިވެފައިވާ ގޮންޖެހުމެކެވެ. އެހެންވީމާ، މި ކަންކަން ރަނގަޅުކުރުމަށްޓަކައި މުވައްޒަފުން ތަމްރީނުކުރުމާއި، އަލުން ތަމްރީނުކުރުމާއި، ސުޕަވައިޒަރުންގެ ހުނަރު އިތުރުކުރުމަކީވެސް އަޅުގަނޑުމެން ކުރާނެ އަދި މިހާރުވެސް ފަށާފައިވާ ކަމެކެވެ،” ކޮމިޝަނަރ އޮފް ޕޮލިސް އިސްމާއިލް ނަވީން ވިދާޅުވިއެވެ.
ކޮމިޝަނަރ ނަވީން އިތުރަށް ވިދާޅުވީ ޤާނޫނީ ޒިންމާ އަދާކުރުމުގައި މިހާރަށްވުރެ ކަންކަން އިތުރަށް ހަރުދަނާކުރުމަށްވެސް މަސައްކަތްކުރަމުންދާ ކަމަށެވެ.
ރައްޔިތުންނާއި ފުލުހުންނާ ދެމެދު އޮންނަ ގުޅުން ބަދަހިކުރުމަށްޓަކައި، އައު އުކުޅުތައް ތަޢާރަފުކުރުމުގެ ބަދަލުގައި މިހާރު ފަށާފައިވާ މަސައްކަތްތައް އިތުރަށް ހަރުދަނާކުރުމަށް އިސްކަންދެއްވާނެ ކަމަށް ކޮމިޝަނަރ ނަވީން ވިދާޅުވިއެވެ. މިގޮތުން، “އަވައްޓެރި ފުލުހުން” ޕްރޮގްރާމަކީ ކާމިޔާބު މަސައްކަތެއްކަމަށް ފާހަގަކުރައްވައި، މި ޕްރޮގްރާމްވެސް ކުރިއަށް އޮތްތަނުގައި އިތުރަށް ފުޅާކުރައްވާނެ ކަމަށް އޭނާ ވިދާޅުވިއެވެ.
މީގެއިތުރުން، ޓެކްނޮލޮޖީގެ އެހީގައި ރައްޔިތުންނާ އޮންނަ ގުޅުން އިތުރަށް ބަދަހިކޮށް، ރައްޔިތުންގެ އިތުބާރު ދެމެހެއްޓުމަށް މަސައްކަތްކުރައްވާނެ ކަމަށްވެސް ކޮމިޝަނަރ އޮފް ޕޮލިސް އިސްމާއިލް ނަވީން ވިދާޅުވިއެވެ.
ކޮމިޝަނަރ ނަވީންގެ އަމާޒަކީ ފުލުހުންގެ ޚިދުމަތް އިތުރަށް ހަރުދަނާކޮށް، ރައްޔިތުންގެ އިތުބާރު ދެމެހެއްޓުމެވެ. މިކަން ހާސިލުކުރުމަށްޓަކައި، ތަޙްޤީޤުތަކުގެ ހާމަކަން އިތުރުކުރުމާއި، މުވައްޒަފުންގެ ޤާބިލުކަން އިތުރުކުރުމާއި، ކުރުމާއި، ޓެކްނޮލޮޖީގެ ބޭނުން އެދެވޭގޮތުގައި ހިފުމާއި، އަދި މިހާރު ހިންގަމުންދާ ކާމިޔާބު ޕްރޮގްރާމްތައް އިތުރަށް ފުޅާކުރުން ހިމެނެއެވެ.
