ޙައްޖު އަޅުކަން އަދާކޮށްގެން އެނބުރި އަންނަ ފަރާތްތަކަށް ދިމާވެދާނެ ޞިއްޙީ މައްސަލަތަކަށް އަވަސް ފަރުވާއެއް ފޯރުކޮށްދިނުމުގެ މަޤްޞަދުގައި ޓްރީ ޓޮޕް ހޮސްޕިޓަލުން ޚާއްޞަ ފްލޫ ކްލިނިކެއް މިއަދު ހުޅުވައިފިއެވެ.
ހޮސްޕިޓަލުގެ މައި ދޮރާށި ކައިރީގައި ހުންނަ ސަރަހައްދުގައި ޤާއިމުކޮށްފައިވާ މި ކްލިނިކުގެ ޚިދުމަތް ކޮންމެ ދުވަހަކު ހެނދުނު 10:00 އިން ރޭގަނޑު 8:00 އަށް ލިބެން ހުންނާނެކަމަށް ހޮސްޕިޓަލުން މަޢުލޫމާތު ދީފައިވެއެވެ. އަދި ބަލިމީހުންގެ ރައްކާތެރިކަމަށް އިސްކަންދީ، ބޭރުގައި ޚާއްޞަ އިންތިޒާމެއްގެ ދަށުން މަޑުކުރެވޭނެ ގޮތްވެސް ހަމަޖައްސާފައިވާކަމަށް އެ ފަރާތުން ބުނެފައިވެއެވެ.
ޙައްޖުވެރިން އެނބުރި އަންނައިރު ދަތުރުމަތީގައި މާސްކު އެޅުމާއި، އަމިއްލަ ސާފުތާހިރުކަން ބެލެހެއްޓުމަށް ޚާއްޞަ ސަމާލުކަމެއް ދިނުމަށް ހޮސްޕިޓަލުން އިރުޝާދު ދެއެވެ. އަދި އެނބުރި އައުމަށްފަހު 14 ދުވަހުގެ ތެރޭގައި ހުމާއި، ކެއްސުން ނުވަތަ ނޭވާލުމުގައި ދަތިކަން ކުރިމަތިވެއްޖެނަމަ، ލަސްނުކޮށް ފްލޫ ކްލިނިކަށް ދިއުމަށް އިރުޝާދު ދީފައިވެއެވެ.
މި ކްލިނިކް ޤާއިމުކުރުމުގެ މައިގަނޑު މަޤްޞަދަކީ ނޭވާލާ ނިޒާމާ ގުޅުންހުރި ބަލިތައް އަވަހަށް ދެނެގަނެ، އެކަށީގެންވާ ފަރުވާ ދިނުމާއެކު، އެފަދަ ބަލިތައް މުޖުތަމަޢުގެ ތެރޭގައި ފެތުރުން ހުއްޓުވުމެވެ. ޚާއްޞަކޮށް ކުޑަކުދިންނާއި، އުމުރުން ދުވަސްވީ މީހުންނާއި، ދާއިމީ ބަލިތަކަށް ފަރުވާ ހޯދަމުންދާ ފަރާތްތަކުގެ ރައްކާތެރިކަން ކަށަވަރުކުރުމަށް މި ކްލިނިކުން އިސްކަންދޭނެއެވެ.
ޓްރީ ޓޮޕް ހޮސްޕިޓަލަކީ ދިވެހިރާއްޖޭގެ ޞިއްޙީ ޚިދުމަތުގެ ދާއިރާގައި އިސް ދައުރެއް އަދާކުރަމުން އަންނަ ހޮސްޕިޓަލްއެކެވެ. މި ހޮސްޕިޓަލުގެ މައިގަނޑު އަމާޒަކީ އައު ޚިދުމަތްތައް ތަޢާރަފުކޮށް، ދިވެހި ރައްޔިތުން ބޭރު ޤައުމުތަކަށް ޞިއްޙީ ފަރުވާ ހޯދަން ދާންޖެހޭ ސަބަބު މަދުކުރުމާއި، ޞިއްޙީ ޚިދުމަތުގެ ޚަރަދުތައް ކުޑަކުރުމެވެ. އެންމެ ޒަމާނީ ޓެކްނޮލޮޖީއާއި ފުރިހަމަ ލެބޯޓަރީ ޚިދުމަތްތަކާއި އެކު، ޓްރީ ޓޮޕް ހޮސްޕިޓަލުގެ ތަޖުރިބާކާރު ޑޮކްޓަރުންގެ އަމާޒަކީ ދިވެހިރާއްޖޭގެ ރައްޔިތުންނަށް ގިނަގުނަ ޞިއްޙީ ޚިދުމަތްތަކެއް ފޯރުކޮށްދިނުމެވެ.
އިތުރު މަޢުލޫމާތު ހޯދުމަށް 3351630 އަށް ގުޅުއްވާ ނުވަތަ [email protected] އަށް އީމެއިލް ކުރެއްވުމަށް އެހޮސްޕިޓަލުން އެދެއެވެ.
