މ. ރަތްމަންދޫގައި އައު ކައުންސިލް އިމާރާތުގެ މަޝްރޫޢު ފުރިހަމަކޮށް ނިމިއްޖެއެވެ.

މި މަޝްރޫޢަކީ ޕީ.އެސް.އައި.ޕީ ބަޖެޓުގެ ދަށުން މ. ރަތްމަންދޫ ކައުންސިލާ ހަވާލުކޮށްގެން ކުރިއަށް ގެންދެވުނު 4.8 މިލިއަން ރުފިޔާގެ މަޝްރޫޢެކެވެ. ތުރީ ޓްރީ މޯލްޑިވްސް ޕްރައިވެޓް ލިމިޓެޑާ ހަވާލުކޮށްގެން ކުރިއަށް ގެންދެވުނު މި މަޝްރޫޢުގެ މަސައްކަތް ނިންމާލެވިފައިވަނީ 2025 ވަނަ އަހަރުގެ މާރިޗު މަހުގެ 22 ވަނަ ދުވަހުއެވެ.

މި އިމާރާތުގެ ކުރެހުމާއި ޑިޒައިން ކުރެވިފައިވަނީ މުވައްޒަފުންނަށް މަސައްކަތްކުރުމަށް އެކަށީގެންވާ މާޙައުލެއް ޤާއިމުކުރެވޭނެ ގޮތަށެވެ. މި އިމާރާތުގައި 80 މީހުންގެ ޖާގައިގެ ކޮންފަރެންސް ހޯލަކާއި 16 މީހުންގެ ޖާގައިގެ ބައްދަލުވުންތައް ބޭއްވޭނެ މާލަމެއް ހިމެނެއެވެ. މީގެ އިތުރުން، ކައުންސިލްގެ ރައީސް، ނައިބު ރައީސް، މެންބަރުން އަދި ސެކްރެޓަރީ ޖެނެރަލްއަށް ވަކިވަކި އޮފީސްތައް ޚާއްޞަކުރެވިފައިވެއެވެ. އަދި އަންހެނުންގެ ތަރައްޤީއަށް މަސައްކަތްކުރާ ކޮމިޓީއަށް ޚާއްޞަ މާލަމަކާއި، ސްޓޯރ ރޫމެއް، ނަމާދުކުރާ ތަނެއް، ސައިކޮޓަރިއެއް އަދި އަންހެނުންނާއި ފިރިހެނުންނަށް ވަކިން ފާޚާނާގެ އިންތިޒާމު ހަމަޖެހިފައިވެއެވެ.

ކުރިން މ. ރަތްމަންދޫ ކައުންސިލް އިދާރާގެ ގޮތުގައި ބޭނުންކުރަމުން އައި އިމާރާތަކީ ގިނަ ދުވަސްވެފައިވާ، ޖާގައިގެ ދަތިކަން ހުރި އަދި ވަސީލަތްތައް މަދު އިމާރާތެކެވެ. އައު ކައުންސިލް އިދާރާ ޤާއިމުކުރެވުމާއެކު، ކުރިން ދިމާވަމުން އައި ގޮންޖެހުންތަކަށް އެކަށީގެންވާ ޙައްލު ލިބި، ރައްޔިތުންނާ ގާތުން މިހާރަށްވުރެ ފުރިހަމަ ޚިދުމަތްތަކެއް ފޯރުކޮށްދެވޭނެއެވެ.