އިޒްރޭލުން އީރާނުގެ އަސްކަރީ މަރުކަޒުތަކަށް ވަރުގަދަ ހަމަލާތަކެއް ދީފިއެވެ. މި ހަމަލާތަކުގެ ތެރޭގައި ނަތަންޒްގައި ހުންނަ ނިއުކްލިއާ މަރުކަޒަކަށް އަމާޒުކޮށްފައިވާ ހަމަލާތަކެއް ހިމެނެއެވެ. އިޒްރޭލުގެ އަސްކަރިއްޔާއިން ނެރުނު ބަޔާނެއްގައި ބުނެފައިވަނީ މި ހަމަލާތައް ދީފައިވަނީ އިޒްރޭލުގެ ޖެޓް މަތިންދާބޯޓުތަކުން ކަމަށެވެ.
އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ ބުނެފަިވަނީ މި ހަމަލާތައް އަމާޒުކޮށްފައިވަނީ އީރާންގެ ނިއުކްލިއާ ޕްރޮގްރާމްގެ “ހިތަށް” ކަމަށެވެ. އަދި އީރާނަކީ އިޒްރޭލުގެ ދެމިއޮތުމަށް އޮތް ނުރައްކަލެއް ކަމަށާއި، އެ ނުރައްކާ ނައްތާލެވެންދެން މި ހަމަލާތައް ކުރިއަށް ގެންދާނެ ކަމަށް ވެސް ވިދާޅުވެފައިވެއެވެ.
އީރާންގެ ފަރާތުން ބުނެފައިވަނީ އިޒްރޭލުގެ ހަމަލާތައް އާންމުންގެ އިމާރާތްތަކަށް އަރާފައިވާ ކަމަށެވެ. އަދި މީގެ ސަބަބުން ބަޔަކު މަރުވެފައިވާ ކަމަށާއި، އޭގެ ތެރޭގައި ކުޑަކުދިން ވެސް ހިމެނޭ ކަމަށް އީރާންގެ ދައުލަތުގެ މީޑިއާއިން ބުނެފައިވެއެވެ.
މި ހަމަލާތަކާ ގުޅިގެން އިޒްރޭލު މިހާރު އޮތީ އީރާންގެ ހަމަލާއަކަށް ތައްޔާރުވެ، ކުއްލި ނުރައްކަލުގެ ހާލަތު އިއުލާނުކޮށްފައެވެ. މި ހާދިސާއަކީ ދެ ގައުމުގެ ދެމެދުގައި އޮތް ގުޅުން އިތުރަށް ގޯސްވެ، ސަރަހައްދީ ހަމަޖެހުމަށް ނޭދެވޭ އަސަރުކުރާނެ ކަމެއް ކަމަށް ބެލެވެއެވެ.
