ދިވެހިރާއްޖޭގެ މެރިކަލްޗަރ ސިނާޢަތަށް އިންވެސްޓްކުރުމުގެ ފުރުސަތު އަންނަ މަހު ހުޅުވާލާނެކަމަށް މަސްވެރިކަމާއި ކަނޑުގެ ވަސީލަތްތަކާބެހޭ ވަޒީރު އަލްފާޟިލް އަޙްމަދު ޝިޔާމް ހާމަކުރައްވައިފިއެވެ. ދިވެހި ސަރުކާރުން ދަނީ މެރިކަލްޗަރ ސިނާޢަތް ކުރިއެރުވުމަށް ގިނަގުނަ މަސައްކަތްތަކެއް ކުރައްވަމުންނެވެ.

ވަޒީރު ޝިޔާމް ވިދާޅުވި ގޮތުގައި، މެރިކަލްޗަރއަކީ މި ސަރުކާރުން ވަކި ސިނާޢަތެއްގެ ގޮތުގައި ތަރައްޤީކުރަން އިސްކަންދޭ ދާއިރާއެކެވެ. މިގޮތުން، ބޭރުގެ އިންވެސްޓަރުންނަށް ރާއްޖޭގައި މެރިކަލްޗަރއަށް އިންވެސްޓްކުރެވޭނެ މަގުފަހި މާޙައުލެއް ޤާއިމުކުރުމަށް މަސައްކަތްކުރަމުންދާކަމަށް އެމަނިކުފާނު ފާހަގަކުރެއްވިއެވެ.

ދުނިޔޭގެ މެރިކަލްޗަރ ދާއިރާގައި ކުރިއަރާފައިވާ ޤައުމުތަކުން ދޭ ލުއިތަކަށްވުރެ ހެޔޮ ޝަރުޠުތަކެއް ބޭރުގެ އިންވެސްޓަރުންނަށް ރާއްޖެއިން ހުށަހަޅަމުންދާކަމަށް ވަޒީރު ވިދާޅުވިއެވެ. މީގެ ތެރޭގައި މެރިކަލްޗަރ ކުރުމަށް ޚާއްޞަ ސަރަޙައްދުތަކެއް ކަނޑައެޅުމާއި، އިކުއިޒިޝަން ކޮސްޓް އުނިކުރުމާއި، އަދި ތިން އަހަރު ދުވަހުގެ މުއްދަތަށް ބިމު ކުލި ނުނެގުން ހިމެނެއެވެ. މިފަދަ ލުއިތަކުގެ ސަބަބުން މި ދާއިރާގައި ވިޔަފާރި ފަށާ ފަރާތްތަކަށް ކުރަންޖެހޭ އިންވެސްޓްމަންޓްގެ މިންވަރު ބޮޑުތަން ކުޑަވެގެންދާނެކަމަށް ވަޒީރު ވިދާޅުވިއެވެ.

“މިހާރު އަޅުގަނޑުމެން ދަނީ އިންވެސްޓްމަންޓް ފުރުސަތުތައް ހުޅުވާލުމުގެ މަސައްކަތްތައް ފުރިހަމަކުރަމުންނެވެ. ބިޑް ޑޮކިއުމަންޓްތައް ތައްޔާރުކުރެވި، އިރާދަކުރެއްވިއްޔާ މިއަންނަ މަހުގެ ފަހުކޮޅު މި ފުރުސަތު ހުޅުވާލެވޭނެއެވެ. އަޅުގަނޑުމެންގެ ވިސްނުމަކީ ތިން މަސްދުވަހުގެ މުއްދަތެއް ބޭރުގެ އިންވެސްޓްމަންޓްތަކަށް ޚާއްޞަކޮށް، ރާއްޖެއަށް ފައިދާހުރި އިންވެސްޓްމަންޓްތައް ހޯދުމެވެ.” ވަޒީރު ވިދާޅުވިއެވެ.

މީގެއިތުރުން، މެރިކަލްޗަރ ޒޯންތަކާ ގުޅޭ ގައިޑްލައިންތަކާއި ގަވާއިދުތައްވެސް މިހާރު އެކުލަވާލައި ގެޒެޓްކޮށްފައިވާކަމަށް ވަޒީރު ހާމަކުރެއްވިއެވެ.

ވަޒީރު ޝިޔާމް އިތުރަށް ވިދާޅުވި ގޮތުގައި، ރާއްޖޭގެ މެރިކަލްޗަރ ސިނާޢަތް މިވަގުތު އޮތީ އިބްތިދާއީ މަރުޙަލާގައެވެ. ނަމަވެސް ސަރުކާރުގެ އަމާޒަކީ މި ސިނާޢަތް ފުޅާކޮށް، ކަނޑުގެ ކާބޯތަކެތީގެ ބާވަތްތައް ރާއްޖެއަށް އިމްޕޯޓްކުރާ މިންވަރު މަދުކުރުންކަމުގައި އެމަނިކުފާނު ފާހަގަކުރެއްވިއެވެ.