ދިވެހިންގެ އުފެއްދުންތެރިކަމުގެ މައުރަޒު ވަނީ ފާހަގަކޮށްލެވޭ ކާމިޔާބީއެއް ހޯދާފައެވެ. އިގުތިސާދީ ތަރައްގީއާ ބެހޭ ވަޒީރު މުހައްމަދު ސައީދު ވިދާޅުވި ގޮތުގައި މި ކާމިޔާބީގެ އަސްލަކީ މައުރަޒުގައި ބައިވެރިވި ދިވެހި ފަންނުވެރިންނާއި އުފެއްދުންތެރިންނެވެ.
ނުވަ ދުވަހުގެ މުއްދަތަށް ކުރިއަށް ގެންދެވުނު މި މައުރަޒަށް، ސަރުކާރުގެ އަންދާޒާއާ އެއްގޮތަށް، 200،000 އާ ގާތްކުރާ އަދަދެއްގެ މީހުން ޒިޔާރަތްކޮށްފައިވެއެވެ. މިއީ ކުރިން ލަފާކުރެވުނު އަދަދަށްވުރެ މަތީ އަދަދެކެވެ.
މިނިސްޓަރު ސައީދު އެކްސްގައި ކުރެއްވި ޕޯސްޓެއްގައި ވިދާޅުވެފައިވަނީ މި މައުރަޒުގެ ކާމިޔާބީއަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ތަސައްވުރަކަށް ގެނެވުނު ހަގީގަތެއް ކަމަށެވެ. އަދި މިފަދަ މައުރަޒެއްގެ މުހިންމުކަމާ ގުޅޭގޮތުން މިއަހަރުގެ ރިޔާސީ ބަޔާނުގައި ރައީސް ފާހަގަކުރެއްވި ނުކުތާތަކެއް މިނިސްޓަރު ހިއްސާކުރެއްވިއެވެ.
ދިވެހީންގެ އުފެއްދުންތެރިކަމުގެ މައުރަޒު 2025 ނުވަތަ Maldives Expo 2025، ނުވަ ދުވަހުގެ މުއްދަތަށްފަހު ރޭވަނީ ނިމުމަކަށް އައިސްފައި.
މިއީ ރައީސް ޑރ. މުއިއްޒުގެ ތަޞައްވުރެއްގައި ކުލަޖެހުން. އަދި މިއަހަރުގެ ރިޔާސީ ބަޔާނުގައިވެސް ވިދާޅުވިފަދައިން، މިފަދަ ހަރަކާތެއް ހިންގުމުގެ އެންމެ… pic.twitter.com/enfAqggMVK— Mohamed Saeed (@em_saeed) June 1, 2025
ރައީސްގެ ވިސްނުންފުޅުގައި، މިފަދަ މައުރަޒެއްގެ މަގުސަދަކީ ދިވެހިންގެ އުފެއްދުންތެރިކަން އިތުރުކޮށް، ގައުމުގެ ކްރިއޭޓިވް އިންޑަސްޓްރީ ބާރުވެރިކުރުވުމާއި، ގައުމީ އުފެއްދުންތެރިކަމުގެ ތެރޭގައި ކްރިއޭޓިވް އިކޮނޮމީގެ ހިއްސާ އިތުރުކުރުން ކަމަށް މިނިސްޓަރު ފާހަގަކުރެއްވިއެވެ.
މިނިސްޓަރު އިތުރަށް ވިދާޅުވެފައިވަނީ މައުރަޒު ރޭވި ހިންގާފައިވަނީ މި މަގުސަދުތައް ހާސިލުކުރުމަށް އަމާޒުކޮށްގެން ކަމަށެވެ. މިގޮތުން އުފެއްދުންތެރިކަމުގެ މައުރަޒުގެ އިތުރުން، ކްރިއޭޓިވް އިކޮނޮމީ ޑިސްޓްރިކްޓް، ޑިޖިޓަލް ޑިސްޓްރިކްޓް، އަދި މާކެޓް ޕްލޭސް ޑިސްޓްރިކްޓުގެ ނަމުގައި ކާމިޔާބު ހަރަކާތްތަކެއް ހިންގިފައިވާ ކަމަށް އެމަނިކުފާނު ވިދާޅުވިއެވެ.
މީގެ އިތުރުން، އެންޓަޓައޓަޓައިންމެންޓް ޑިސްޓްރިކްޓުގައި ކުޅިވަރާއި މުނިފޫހިފިލުވުމުގެ ގިނަ ހަރަކާތްތަކެއް ކުރިއަށް ގެންދެވުނު ކަމަށާއި، ކުޑަކުދިންނާއި އާއިލާތަކަށް ޚާއްސަ އެތައް ހަރަކާތެއް ބޭއްވިފައިވާކަން މިނިސްޓަރު ފާހަގަކުރެއްވިއެވެ.
މިނިސްޓަރު ސައީދު ވަނީ މި މައުރަޒުގެ މަސައްކަތުގައި ހަރަކާތްތެރިވި އެންމެހައި ފަރާތްތަކަށް، ޚާއްސަކޮށް ބިޒްނަސް ސެންޓަރ ކޯޕަރޭޝަން (ބީސީސީ)ގެ މެނޭޖުމަންޓާއި މުޅި ޓީމުގެ މަސައްކަތަށް ޚާއްސަ ޝުކުރެއް އަދާކުރައްވާފައެވެ.
އަދި މައުރަޒުގެ ކާމިޔާބީގެ އެންމެ މުހިންމު ބައިވެރިންނަކީ ދިވެހި ފަންނުވެރިންނާއި، އުފެއްދުންތެރިންނާއި ހީވާގި މަސައްކަތްތެރިންކަން ފާހަގަކުރައްވައި، މިނިސްޓަރު ވަނީ މައުރަޒުގައި އެކި އުފެއްދުންތަކާއި ހުނަރުތައް ހުށަހެޅި ހުރިހާ ފަރާތްތަކަށް އިޚްލާޞްތެރި ޝުކުރެއް އަދާކުރައްވާފައެވެ.
މި މައުރަޒަކީ ފާއިތުވި އަހަރުތަކުގައި ދިވެހިންގެ މަސައްކަތްތެރިކަމާއި އުފެއްދުންތެރިކަމާއި ފަންނުވެރިކަން އަދި ޒަމާނީ އީޖާދީ ދާއިރާތަކުގައި ދިވެހިން ހޯދާފައިވާ ކާމިޔާބީތައް އެއްތަނަކުން ފެންނާނެހެން އިންތިޒާމުކުރެވުނު ފުރަތަމަ މައުރަޒެވެ. މި މައުރަޒުގައި ގިނަ އަދަދެއްގެ ބައިވެރިން އެމީހުންގެ އުފެއްދުންތަކާއި ހުނަރުތައް ދައްކުވައިދީފައިވާއިރު، މައުރަޒު ބަލައިލުމަށް ކޮންމެ ރެއަކުވެސް އެތައް ހާސް ބަޔަކު ޒިޔާރަތްކުރަމުން ދިޔައެވެ.
މި މައުރަޒަކީ ދިވެހިރާއްޖޭގެ އުފެއްދުންތެރިކަމާއި ފަންނުވެރިކަމުގެ ދާއިރާއަށް އައު ހިތްވަރަކާއި ފޯރިއެއް ގެނެސްދިން، އަދި ދިވެހި އުފެއްދުންތެރިންނަށް އެމީހުންގެ ހުނަރާއި ޤާބިލުކަން ދައްކުވައިދިނުމުގެ މުހިންމު ފުރުޞަތެއް ހޯދައިދިން ކާމިޔާބު މަސައްކަތެއްގެ ގޮތުގައި ފާހަގަކުރެވެއެވެ. މިފަދަ މައުރަޒުތަކުން ޤައުމުގެ އިޤްތިޞާދީ ކުރިއެރުމަށާއި، ޘަޤާފީ ދިރުވުމަށް ލިބޭނެ ފައިދާތައް ވަރަށް ބޮޑެވެ.
ކިޔުންތެރިންގެ ހިޔާލު