ރާއްޖޭގެ ތަރައްގީއަށް ސިންގަޕޫރުން ދެއްވާ އެހީތެރިކަމަށް ޚާރިޖީ ވަޒީރު ޑރ. އަބްދުﷲ ޚަލީލް ޝުކުރު އަދާކުރައްވައިފިއެވެ.

ދިވެހިރާއްޖެއާއި ސިންގަޕޫރާއި ދެމެދު ޤާއިމްކޮށްފައިވާ ސިޔާސީ ގުޅުމަށް 50 އަހަރު ފުރުމުގެ މުނާސަބާ ފާހަގަކުރެއްވުމުގެ ގޮތުން ސިންގަޕޫރުން ދިވެހިރާއްޖެއަށް ކަނޑައަޅުއްވާފައި ހުންނަވާ ނޮން-ރެޒިޑެންޓް ސަފީރު މިސްޓަރ ސޫ ކޮކް ލެންގ ގެ ބޭއްވެވި ހަލްފާގެ ޝަރަފްވެރި މެހެމާނެއްގެ ގޮތުގައި މިނިސްޓަރ އޮފް ފޮރިން އެފެއާޒް ޑޮކްޓަރ އަބްދުﷲ ޚަލީލް މިއަދު ވަނީ ބައިވެރިވެވަޑައިގެންފައެވެ.

މިހަފްލާގައި އެމަނިކުފާނުވަނީ ދިވެހިރާއްޖެއާއި ސިންގަޕޫރާއި ދެމެދު އޮތް ޒަމާންވީ ގާތް ގުޅުމާއި ދިވެހިރާއްޖޭގެ ތަރައްގީއަށް ސިންގަޕޫރުން ދެއްވާ އެހީތެރިކަމަށް ޝުކުރުއަދާކުރައްވާފައެވެ. ހާއްސަގޮތެއްގައި ޕަބްލިކް އެޑްމިނިސްޓްރޭޝަން ރީފޯމް އާއި، މުއައްސަސާތައް ހަރުދަނާ ކުރުމަށާއި، ފަންނީ އެހީތެރިކަމާއި މީހުން ބިނާކުރުމުގައި ސިންގަޕޫރުން ދެއްވާ އެހީތެރިކަން މިނިސްޓަރ ޚަލީލް ފާހަގަ ކުރެއްވިއެވެ.

މީގެ އިތުރުން، ރައީސުލްޖުމްހުރީއްޔާ ޑޮކްޓަރ މުޙައްމަދު މުޢިއްޒުގެ ތަސައްވުރަކީ ދިވެހިރާއްޖެ އާއި ސިންގަޕޫރާއި ދެމެދު އޮތް ގުޅުން އިތުރަށް ހަރުދަނާ ކުރެއްވުންކަމާއި، ވިޔަފާރިއާއި އިގްތިސާދީ ގުޅުން އިތުރުކުރުން ކަމުގައިވެސް މިނިސްޓަރ ޚަލީލް ވިދާޅުވިއެވެ.

މިނިސްޓަރގެ ވާހަކަފުޅުގައި ހަފްލާ ބޭއްވެވި ކަމަށްޓަކައި ނޮން-ރެޒިޑެންޓް ސަފީރު މިސްޓަރ ސޫ ކޮކް ލެންގ އަށް ޝުކުރު އަދާކުރައްވާ އަދި ދެޤައުމުގެ ސިޔާސީ ގުޅުމުގެ ހާއްސަ މޭލުގާއަށް ތަހުނިޔާއާއި ހެޔޮ އެދުންތައް އަރިސްކުރެއްވިއެވެ.