މި އަހަރަކީ ދިވެހި ޙައްޖުވެރިންނަށް އެންމެ ފަސޭހަ އަދި އިންތިޒާމުތައް އެންމެ ރަނގަޅު ޙައްޖު މޫސުމަށް ވާނެ ކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ރައީސް މިފަދައިން ވިދާޅުވީ، ޙައްޖުގެ ދަތުރާއި ގުޅުންހުރި އެހެނިހެން ކަންކަން ފަސޭހަކުރުމަށް ސަޢޫދީ ސަރުކާރުން ތަޢާރަފުކޮށްފައިވާ “މައްކާ ރޫޓް އިނިޝިއޭޓިވް” ގައި ދިވެހިރާއްޖެ ބައިވެރިކުރުމަށް ނިންމާފައިވާތީއެވެ. މި ނިންމުމާއެކު، ކުރީގެ އަހަރުތަކުގައި ޙައްޖުވެރިން ތަޙައްމަލުކުރަންޖެހުނު ގިނަ ދަތިތަކެއް މި އަހަރު ކުރިމަތިނުވާނެއެވެ.

ރައީސް އިތުރަށް ފާހަގަކުރެއްވި ގޮތުގައި، މި އިނިޝިއޭޓިވްގައި ބައިވެރިވުމުގެ ފުރުޞަތު މި އަހަރު ލިބުނު އަށް ޤައުމުގެ ތެރޭގައި ދިވެހިރާއްޖެ ހިމެނުމަކީ ވަރަށް ބޮޑު އުފަލަކާއި ޝަރަފެކެވެ. އަދި ރާއްޖެއިން މި އަހަރު ޙައްޖަށް ވަޑައިގެންނެވި ފުރަތަމަ 235 ޙައްޖުވެރިންނަށް ސަޢޫދީ ސަރުކާރުން ވަރަށް ހޫނު މަރުޙަބާއަކާއެކު ފުރިހަމަ މެހެމާންދާރީއެއް އަދާކޮށްފައިވާކަންވެސް ފާހަގަކުރެއްވިއެވެ.

މި އިނިޝިއޭޓިވްގެ ސަބަބުން ޙައްޖުވެރިންނަށް ލިބޭ ލުއިފަސޭހަތަކުގެ ތެރޭގައި، ވައިގެބަނދަރުގައި ގިނަ ވަގުތު މަޑުކުރަން ނުޖެހުމާއި، އަމިއްލައަށް ފޮށިތަންމަތި އުފުލަން ނުޖެހުން ފަދަ ކަންކަން ހިމެނެއެވެ. މީގެ އިތުރުން، މުޅި ޙައްޖު ދަތުރުގައިވެސް މިފަދަ ބޮޑެތި ލުއިފަސޭހަތަކެއް ލިބިގެންދާނެ ކަމަށާއި، ޙައްޖުވެރިންނަށް ލިބޭ ޚިދުމަތުގެ ފެންވަރު ރަނގަޅުވާނެ ކަމުގެ ޔަޤީންކަން ރައީސް ދެއްވިއެވެ.

ރައީސް އިތުރަށް ވިދާޅުވީ، އެމަނިކުފާނުގެ އުންމީދަކީ ކުރިއަށް އޮތް އަހަރުތަކުގައި ޚިދުމަތްތައް އިތުރަށް ރަނގަޅުވެ، ކަންކަން އިތުރަށް ފަހިވެގެންދިއުން ކަމަށެވެ.

“ދިވެހި ޙައްޖުވެރިންނަށް ވަރަށް ބޮޑެތި ފަސޭހަތަކެއް މި އަހަރު ހޯދައިދެވޭތީ މާތްﷲގެ ޙަޟްރަތަށް ޙަމްދުކުރަން. އަދި ސަޢޫދީ ސަރުކާރަށް ޝުކުރު ދަންނަވަން،” ރައީސް ވިދާޅުވިއެވެ.

ނިންމަވާލައްވަމުން ރައީސް، ހުރިހާ ޙައްޖުވެރިންނަށް ހިތްހަމަޖެހުމާއި ދުޅަހެޔޮކަމާއެކު މަބްރޫރު ޙައްޖެއް ލިބުން އެދިވަޑައިގެން މާތްﷲގެ ޙަޟްރަތުގައި ދުޢާ ދެންނެވިއެވެ.